काठमाडौं वर्ल्ड स्कूलले हेटौंडामा प्रवर्धनात्मक कार्यक्रम गर्ने

फाइल तस्बिर

१३ चैत, हेटौंडा । भक्तपुरस्थित काठमाडौं वर्ल्ड स्कूलले हेटौंडामा आफ्नो प्रवर्धनात्मक कार्यक्रम गर्ने भएको छ । नेपालकै महंगो विद्यालयको रुपमा चर्चामा रहेको अर्बपति विनोद चौधरीको कम्पनि चौधरी ग्रुपको काठमाडौं वर्ल्ड स्कूलले चैत १७ गते हेटौंडाको एभोकाडो होटेलमा अभिभावक र सरोकारवालासँग प्रवर्धनात्मक प्रस्तुती राख्ने तयारी गरेको छ ।
आगामी शैक्षिक सत्रलाई लक्षित गरी देशव्यापी प्रवर्धनात्मक कार्यक्रम गर्ने क्रममा काठमाडौं वर्ल्ड स्कूलका अध्यक्ष डा. मिथिलेश कुमार झा र प्रिन्सीपल केशर बहादुर खुलालले हेटौंडा आएर विद्यालयको विषयमा जानकारी गराउनुका साथै अभिभावक र सरोकारवालासँग अन्तरक्रिया गर्ने छन् । स्कूलले पहिलो पटक हेटौंडामा प्रवर्धनात्मक कार्यक्रम गर्न लागेको हो । प्रदेशको राजधानी भएकोले पनि हेटौंडामा कार्यक्रम गर्न लागिएको स्कूल व्यवस्थापनले जनाएको छ ।
आजको प्रतिस्पर्धी विश्वमा दक्ष जनशक्ति तयार पार्न गुणस्तरीय शिक्षा अनिवार्य रहेकोले स्कूलले गुणस्तरीय शिक्षालाई सुनिश्चित गर्दै लक्षित अभिभावकलाई बुझाउने उद्देश्यले कार्यक्रम राखेको स्पष्ट पारेको छ । संस्कारयुक्त र समयसापेक्ष शिक्षा प्रदान गर्दै आएको स्कूलको दावी छ । यसअघि फागुन महिनामा बिर्तामोड, विराटनगर, धरान, इटहरी, चितवन, पोखरा, बुटवलमा प्रवद्र्धनात्मक कार्यक्रम गरिसकेको स्कूलले चैत महिनामा हेटौंडासहित बीरगन्ज र जनकपुरमा पनि कार्यक्रम गर्दैछ ।