तरुण दलको आयोजनामा चौघडामा शुभकामना दौड हुने

२१ चैत, हेटौंडा । नेपाल तरुण दल हेटौंडा ६ नम्बर वडा इकाई समितिले नयाँ वर्ष २०८० को अवसरमा शुभकामना दौड प्रतियोगिता गर्ने भएको छ । 
नयाँ वर्षको शुभकामना आदानप्रदान संगै ५ किलोमिटर दौड प्रतियोगिताको आयोजना गर्न लागिएको नेपाल तरुण दल हेटौंडा ६ नम्बर वडाका अध्यक्ष कमल कोइरालाले जानकारी दिए । 
शुभकामना दौडका लागि मकवानपुर जिल्ला स्थायी ठेगाना भएको हुनुपर्ने अध्यक्ष कोइरालाले बताए । चौघडा बजारदेखी चुच्चेखोला चोकसम्म पुगेर चौघडा बजारमा आएपश्चात ५ किलोमिटर दौड पूरा हुने छ । 
दौड प्रतियोगिताको लागि विभिन्न उपसमितिहरु समेत गठन गरिएको छ । आर्थिक समितिको संयोजकमा भूपेन्द्र विष्ट, प्रचारप्रसार समितिमा विजय पौडेल, स्वागत तथा सम्मान समितिमा राजकुमार बास्तोला, स्वयम्सेवक परिचालन समितिमा इश्वर राना र सचिवालय समिति तरुण दल ६ नम्बर वडाका सचिव विजय चौलागाई रहेका छन् ।
प्रतियोगितामा सहभागिताका लागि हेटौंडा ४ स्कुलरोडमा रहेको पाण्डे इन्टरप्राइजेज, नेपाली कांग्रेस जिल्ला पार्टी कार्यालय, नेपाली कांग्रेस ६ नम्बर वडा इकाई समितिको सचिवालयमा र हेटौंडा २ कांग्रेसचोकमा रहेको बेङ्कटेश छापाखानामा दौड प्रतियोगितामा सहभागिता जनाउन इच्छुकले फारम भर्ने व्यवस्था रहेको छ । 
प्रतियागिताको प्रथम हुनेले नगद १५ हजार रुपैयाँ, दोस्रो हुनेले १० हजार रुपैयाँ र तेस्रो हुनेले नगद ५ हजार रुपैयाँ प्राप्त गर्नेछन् । नेपाल तरुण दल ६ नम्बर वडा इकाई समितिले आयोजना गरेको शुभकामना दौडकोे यो ८ औँ संस्करण हो ।