बागमती प्रदेशमा अपराधका मुद्धा दर्ता ३.१ प्रतिशतले बढ्यो

२४ जेठ, हेटौंडा । बागमती प्रदेशमा अपराधका मुद्धा दर्ता ३.१ प्रतिशतले बढेको तथ्यांकले देखाएको छ । बागमती प्रदेश प्रहरी कार्यालय हेटौंडाको तथ्यांक अनुसार गत आव २०७८/७९ को तुलनामा चालु आव २०७९/०८० को जेठ २२ गतेसम्ममा अपराधका मुद्धा दर्ता ३.१ प्रतिशतले बढेको देखिएको हो ।
गत आर्थिक बर्षमा ३९३४ मुद्धा दर्ता भएकोमा चालु आव यो अवधीमा ४०५४ मुद्धा दर्ता भएको तथ्यांकमा उल्लेख छ । कर्तव्य ज्यान मुद्धा गत आवमा ५५ मुद्धा दर्ता भएकोमा ३४.५ प्रतिशतले घटेर चालु आवमा ३६ मुद्धा दर्ता भएको छ । ज्यान मार्ने उद्योगमा गत आवमा १०२ मुद्धा दर्ता भएकोमा ३८.२ प्रतिशतले कमी आएर ६३ मुद्धा दर्ता भएका छन् । सवारी ज्यान मुद्धामा गत आवमा २९७ मुद्धा दर्ता भएकोमा चालु आवमा ३० प्रतिशतले कमी आई २०८ मुद्धा दर्ता भएको तथ्यांकले देखाएको छ । लागु औषध मुद्धा गत आवमा ३०५ दर्ता भएकोमा चालु आवमा ५.६ प्रतिशतले बढेर ३२२ वटा दर्ता भएको छ । जवरजस्ती करणी उद्योग अन्तरगत गत आर्थिक बर्षमा ६१ मुद्धा दर्ता भएकोमा चालु आवमा ३.३ प्रतिशत घटेर ५९ वटा मुद्धा दर्ता भएको छ ।
त्यस्तै, गत आवमा आत्महत्याका ७८९ मुद्धा दर्ता भएकोमा चालु आवको यो अवधीमा ०.६ प्रतिशत बढेर ७९४ मुद्धा दर्ता भएको छ । गत आवमा ठगीका ४० मुद्धा दर्ता भएकोमा चालु आवमा ४२.५ प्रतिशतले बढेर ५७ मुद्धा दर्ता भएको छ । चोरीका मुद्धा गत आवमा २३६ वटा दर्ता भएकोमा ९.७ प्रतिशतले बढेर चालु आवमा २५९ मुद्धा दर्ता भएको छ । त्यस्तै, गत आवमा ३० जुवासम्बन्धी मुद्धा दर्ता भएकोमा १० प्रतिशतले बढेर चालु आवमा ३३ मुद्धा दर्ता भएको छ । बहुविवाह मुद्धा गत आवमा ८५ मुद्धा दर्ता भएकोमा २३.५ प्रतिशतले घटेर चालु आवमा ६५ मुद्धा दर्ता भएको छ । त्यस्तै, अन्य शिर्षकमा गत आवमा १६९६ मुद्धा दर्ता भएकोमा चालु आवमा १४ प्रतिशतले बढेर १९३४ मुद्धा दर्ता भएको बागमती प्रदेश प्रहरी कार्यालय हेटौंडाले जनाएको छ ।