मनहरीको पशुपति माविले विद्यार्थीलाई साइकल दिने

३१ जेठ, हेटौंडा । विद्यार्थीलाई नियमिति विद्यालय आउँने वातावरण बनाउँन मकवानपुरको मनहरी गाउँपालिका वडा नम्बर ४ मसिनेस्थित पशुपति माध्यमिक विद्यालयले विद्यार्थीलाई साइकल दिने भएको छ । 
विद्यालयले कक्षा ६ देखि कक्षा १० सम्म अध्ययन गर्ने विद्यार्थीहरुलाई साइकल दिने भएको हो । बिद्यालयका प्रधानाध्यापक भानुभक्त आचार्यले विद्यालयका कक्षा ६ देखि कक्षा १० सम्मका ११५ जना छात्रछात्रालाई साइकल दिन लागेको जानकारी दिए ।
वडा नम्बर ४ ले साइकल खरिद गर्न १० लाख रुपैयाँ सहयोग गरेपछि चालु शैक्षिक सत्रबाटै विद्यार्थीहरुलाई साइकल वितरण गर्नेगरि साइकल खरिद गरेर जडानको काम अन्तिम चरणमा पुगेको उनले बताए । 
विद्यालय व्यवस्थापन समितिका अध्यक्ष माधव गौतमले विद्यालय आउँजाउँ गर्न एक घण्टाभन्दा बढी पैदल हिँड्नु पर्ने वाध्यता भएका विद्यार्थीलाई साइकल प्रदान गर्न लागिएको जानकारी दिए । पालिकाको ३ र ४ नम्बर वडाका पशुपति नाथ माविमा पढ्ने विद्यार्थीहरुलाई लक्षित गरि कार्यविधि पनि तयार पारिएको बताए । 
अध्यक्ष गौतमले साइकलको मर्मत विद्यार्थी र अभिभावक आफैले गर्नुपर्ने र कक्षा १० पास भएपछि साइकल विद्यालयलाई फिर्ता गर्नुपर्ने सहमती गर्ने तयारी भइरहेको र जतन गरेर साइकल फिर्ता गर्ने विद्यार्थीलाई पुरस्कारको समेत व्यवस्था गरेको जानकारी दिए ।