विश्व कप छनोटमा नेपालले अमेरिकालाई हरायो

६ असार, हेटौंडा । आईसीसी एकदिवसीय विश्वकप छनोट प्रतियोगिता अन्तर्गत नेपालले अमेरिकाबिरुद्ध जित निकालेको छ । मंगलबार जिम्बाबेको हरारेमा भएको खेलमा नेपालले अमेरिकालाई ६ विकेटले हराएको हो । 
अमेरिकाले दिएको २ सय ८ रनको लक्ष्य नेपालले ४३ ओभरमा ४ विकेट गुमाएर भेट्टायो । नेपालको जितका लागी भीम सार्की र दिपेन्द्रसिंह ऐरीले नटआउट क्रमशः ७७ र ३९ रन बनाउँदा कुशल भुर्तेलले पनि ३९ रन कै योगदान दिए ।
यसअघि नेपालसँग टस हारेर पहिले ब्याटिङको निम्तो पाएको अमेरिकाले ४९ ओभरमा अलआउट हुँदै २ सय ७ रन बनाएको थियो । उसका शायन जहंगिरले नटआउट एक सय रन बनाए । बलिङतर्फ नेपालका करण केसीले ४, गुल्सन झाले ३,  दिपेन्द्रसिंह ऐरीले २ र ललित राजवंशीले एक विकेट लिए । 
प्रतियोगिता अन्तर्गत भएको पहिलो खेलमा नेपाल जिम्बावेसँग र अमेरिका वेस्ट इन्डिजसँग पराजित भएका थिए । यस्तै, आईसीसी एकदिवसीय विश्व कप छनोट प्रतियोगिता अन्तर्गत जिम्बावेले नेदरल्याण्ड्सलाई  ६ विकेटले हराएको छ । 
लगातार दोस्रो जितसँगै जिम्बावे ४ अङ्कसहित तालिकाको शीर्ष स्थानमा छ । समान २÷२ अङ्क भएका वेस्ट इन्डिज दोस्रो र नेपाल तेस्रो  स्थानमा छन् । लगातार दोस्रो हार बेहोरेको अमेरिका चौथो र नेदरल्याण्ड्स पुछारमा छ ।