विजय यूथ गोल्डकपः ढल्के जोवन र पशुपति विजयी

८ असार, हेटौंडा । हेटौंडाको पिप्ले–क्याम्पा रंगशालामा जारी दोस्रो संस्करणको विजय यूथ गोल्डकप फुटबल प्रतियोगिता अन्तर्गत बिहबारको खेलमा ढल्के जोवन एफसी र पशुपति युवा क्लव विजयी भएका छन् । 
पहिलो खेलमा हटिया भेट्रान्स क्लवलाई १–० ले हराउँदै ढल्के जोवनले अन्तिम ८ मा स्थान बनाएको हो । ढल्के जोवनका लागि दोस्रो हाफको अन्तिमतिर मनोज लामाले गरेको गोल नै निर्णायक बन्यो । उनी नै खेलको म्यान अफ द म्याच भए । 
यस्तै दोस्रो खेलमा पशुपति युवा क्लवले हेटौंडा फुटबल एकेडेमी ‘बी’ लाई १–० ले हराएको हो । पशुपतिका लागि समिर चौलागाईंले निर्णायक गोल गरेका हुन् । उनी नै खेलको म्यान अफ द म्याच बने । 
जारी प्रतियोगितामा शुक्रबार चाइना पब्लिक यूथ क्लव र चौकीटोल यूथ क्लव तथा हेटौंडा फुटबल एकेडेमी ए र विजय यूथ क्लवको बीचमा खेल हुने आयोजकले जानकारी दिएको छ । १५ गतेसम्म सञ्चालन हुने प्रतियोगिताको विजेताले २ लाख र उपविजेताले एकलाख रुपैयाँसहित ट्रफी, मेडल र प्रमाणपत्र प्राप्त गर्नेछ । 
यस्तै सर्वोत्कृष्ट खेलाडीलाई ५ लाख बराबरको बीमा र नगद १० हजार तथा विधागत उत्कृष्ट खेलाडी र प्रशिक्षकलाई जनही नगद ५ हजार रुपैयाँसहित ट्रफी प्राप्त गर्नेछन् । प्रतियोगितामा सहभागी विभिन्न टिमबाट खेल्न ए डिभिजन लिग खेलिसकेका खेलाडीहरु समेत हेटौंडा आएका छन् ।