महोत्सवमा स्थानीयलाई विशेष प्राथमिकता : खड्गी

File Photo

२८ मंसिर, हेटौँडा । सुमन भोम्जन स्मृति खेलकुद प्रतिष्ठानका अध्यक्ष भेष खड्गीले पुस ७ गतेदेखि हेटौंडाको टिसिएन मैदानमा हुन लागेको खेलकुद तथा व्यापार महोत्सवमा स्टल राख्न चाहने स्थानीय उद्योगी व्यवसायीलाई विशेष प्राथमिकता दिइने बताएका छन् ।
‘हेटौंडा गोल्डकप फुटबल प्रतियोगितालाई निरन्तता दिनको लागि आर्थिक जोहो गर्न मेला गर्न लागेका हौँ । हाम्रो एउटै मात्र उद्देश्य यही हो, यसलाई केही साथीहरुले गलत प्रचार गरिरहेको र रोक्न खोजेको जानकारीमा आएको छ’, खड्गीले भने, ‘मकवानपुरका उद्योगी व्यवसायीलाई रुष्ट बनाएर हामीले गोल्डकपलाई निरन्तरता दिनुपर्ने र मेला महोत्सव गर्नुपर्ने आवश्यक छैन । महोत्सवमा मकवानपुरका उद्योगी व्यवसायीलाई विशेष प्राथमिकता र छुटको व्यवस्था गर्नेछौँ ।’ 
मकवानपुरका उद्योगी व्यवसायी एवम् आम सर्वसाधारणको सहयोगबाट मात्रै महोत्सव सम्पन्न हुने र गोल्डकपले निरन्तरता पाउने भन्दै उनले केही व्यक्तिको स्वार्थको पछि नलाग्न सबैलाई अनुरोध गरे । ‘कम्तिमा हेटौंडा गोल्डकप फुटबललाई निरन्तर गर्न सकियोस्, गोल्डकप मकवानपुरबासीको प्रतिष्ठाको बिषय बनोस् भन्ने हाम्रो उद्देश्य हो’, उनले भने, ‘यहाँका उद्योगी व्यवसायीले गोल्डकपलाई सहयोग गर्ने अवस्था नभएपछि हामी बाध्य भएर महोत्सव गर्ने निर्णयमा पुगेका हौँ ।’ 
महोत्सवको आवश्यक तयारी अघि बढिसेकेको छ भने महोत्सवस्थलमा सामग्रीहरु समेत झरिसकेको छ ।