दोस्रो मनहरी ३ नम्बर वडाध्यक्ष कप आजबाट

१८ असोज, हेटौंडा । मकवानपुरको मनहरी गाउँपालिका ३ हाँडीखोलाको सिद्धकालीमा आज बिहीबारबाट दोस्रो वडाध्यक्ष कप फुटबल प्रतियोगिता सुरु हुँदैछ । 
यही असोज ३० गतेसम्म सञ्चालन हुने प्रतियोगितामा १६ वटा क्लवको सहभागिता रहेको छ । उद्घाटन खेल जनसिद्ध युवा क्लवको ए र मोडर्न युवा क्लवको बीचमा हुने भएको छ । 
प्रतियोगिताको सम्पूर्ण तयारी पूरा भएको आयोजक जनसिद्ध युवा क्लवका अध्यक्ष ईमान लामाले जानकारी दिए । मनहरी गाउँपालिका ३ नम्बर वडा कार्यालयको सहयोगमा हुँदै आएको प्रतियोगिताको विजेताले एकलाख र उपविजेताले ५० हजार रुपैयाँसहित ट्रफी, मेडल र प्रमाणपत्र प्राप्त गर्नेछ ।
नकाउटको आधारमा हुने खुला प्रतियोगितामा आयोजक सहित मोडर्न युवा क्लव, पदमपोखरी फुटबल एकेडेमी, जन आदर्श युवा क्लव, सूर्योदय युवा क्लव, कोशेली युथ क्लव, एफसी राप्ती चितवन, एफसी लामिटार, मनहरी २ खेलकुद विकास समिति, आरआर वाइसी पाल्दमार, मनहरी इसाइ समाज, बुद्ध एफसी  च्यापल, मिलन युवा क्लव र परेलु एफसीको सहभागिता रहेको छ ।
यस्तै सर्वोत्कृष्ट खेलाडीलाई ५ हजार र विधागत उत्कृष्ट खेलाडी तथा हरेक खेलको म्यान अफ द म्याचलाई पुरस्कारको व्यवस्था रहेको आयोजक जनसिद्ध युवा क्लवले जनाएको छ । 
खेलाडीको बीचमा भ्रातृत्वको सम्बन्धसँगै फुटबलको विकास र चाडपर्वको शुभकामना आदानप्रदानको लिागि प्रतियोगितालाई निरन्तरता दिँदै आएको अध्यक्ष लामाले बताए । मनहरी गाउँपालिका ३ नम्बर वडा अध्यक्ष अनन्तप्रकाश अर्यालले खेलकुदमा युवाहरुको आकर्षण बढाउने उद्देश्यले प्रतियोगिता निरन्तरताको लागि सहयोग गर्दै आएको जानकारी दिए ।