मनकामना दुग्ध उत्पादक सहकारीको साधारणसभा सम्पन्न

१५ मङ्सिर, हेटौँडा । मकवानपुरगढी–३ मक्रान्चुलीमा रहेको मनकामना दुग्ध उत्पादक सहकारी संस्थाको ३६ औं वार्षिक साधारणसभा शुक्रवार सम्पन्न भएको छ । 
साधारणसभालाई सम्वोधन गर्दै मकवानपुरगढी गाउँपालिका अध्यक्ष दोर्जे लामा स्याङतानले दूधलाई विविधीकरण गरि मिल्क होलिडे हटाउन सकिने बताए । स्थानीय स्तरमा उत्पादित बस्तुहरुलाई गाउँपालिकाले प्रोत्साहन गर्ने बताउदै अध्यक्ष लामाले गढीको २ नं. वडामा रहेको धरमपानीको खाली जग्गामा स्थानीय स्तरमा उत्पादित बस्तुको विक्री कक्ष राख्ने बताए । 
गाउँपालिका सदैव गाउँबासीहरुको उन्नतीमा काम गर्ने बताउदै सहकारी संस्थाद्धारा उत्पादित बस्तुको बजारीकरणमा सहयोग गर्ने अध्यक्ष लामाको भनाई छ । साधारणसभामा संस्थाका अध्यक्ष अर्जुन प्रसाद दाहालले संस्थागत प्रतिवेदन र लेखा संयोजक भोलानाथ दाहालले आर्थिक प्रतिवेदन पेश गरेका थिए । 
साधारणसभामा गढी गाउँपालिका उपाध्यक्ष मान कुमारी पाख्रिन, वडा नं. ३ का वडा अध्यक्ष भागवत घिमिरे, प्रमुख प्रशासकिय अधिकृत राजेन्द्र कार्की, निवर्तमान गाउँपालिका अध्यक्ष विदुर हुमागाई, मकवानपुर जिल्ला दुग्ध उत्पादक सहकारी संघ, अध्यक्ष हरि कँडेल, राष्ट्रिय सहकारी बैक हेटौडा प्रमुख रामेश्वर अर्याल लगाएतले मन्तव्य व्यक्त गरेका थिए ।
कार्यक्रममा प्रभु बैक गढी शाखा प्रमुख पुष्प महतो, जिल्ला सहकारी संघ, मकवानपुरका पूर्व अध्यक्ष बद्री प्रसाद लम्साल, हिमाल महिला बहुउद्धेश्यीय सहकारी संस्था अध्यक्ष जानकी दाहाल, श्रमिक साना किसान कृषि सहकारी अध्यक्ष निर्मला लम्साल, सिर्जनशिल समाज सहकारी अध्यक्ष कृष्ण विडारी लगायतको आतिथ्यता रहेका थियो ।