सहकारीलाई विश्वासिलो वित्तिय सारथी बनाउनुपर्छः प्रदेश प्रमुख शर्मा

२० चैत, हेटौंडा । बागमती प्रदेश प्रमुख यादवचन्द्र शर्माले सहकारीलाई विश्वासिलो वित्तिय सारथी बनाउनुपर्ने बताएका छन् । ६७ औं राष्ट्रिय सहकारी दिवसको सन्दर्भमा शुभकामना सन्देश जारी गर्दै उनले सहकारीलाई विश्वासिलो वित्तिय सारथीका रुपमा स्थापित गराउनुपर्ने बताएका हुन् । 
‘सहकारीमा सुशासनः प्रविधि र एकीकरण’ भन्ने नारासहित मंगलबार राष्ट्रिय सहकारी दिवस मनाइँदैछ । प्रदेश प्रमुख शर्माले सहकारीमा आइपरेका विकृति–विसंगतिको अन्त्य गर्नुका साथै यसका मूल्य मान्यतामा आधारित भएर सहकारी सञ्चालन गनुपर्ने सुझाव दिएका छन् । 
‘आफ्ना सदस्यहरुको बचत सुरक्षा गर्नु, सहकारीमा आइपरेका विभिन्न विकृतिको अन्त्य गर्नु र यसको मूल्य, मान्यता एवम् सिद्धान्त बमोजिम विश्वासिलो वित्तिय सारथीका रुपमा समाजमा स्थापित गराउनु सहरकारीको दायित्व हो’, प्रमुख शर्माको शुभकामना सन्देशमा भनिएको छ । 
पछिल्लो समय सहकारी क्षेत्रमा केही विकृतिहरु देखा परेको भन्दै शर्माले यस्ता विकृति र विसंगतिहरुलाई नियन्त्रण गर्दै नीति, विधि एवम् पद्घति अनुसार सहकारी सञ्चालनका लागि यसमा संलग्न सबै पक्ष जिम्मेवार हुनुपर्नेमा जोड दिएका छन् । 
शुभकामना सन्देशमा हाम्रो देशमा वि.सं.२०१३ सालमा बखानपुर ऋण सहकारी समिति स्थापित भएसंगै सहकारी अभियान सुरु भएको उल्लेख गर्दै समुदायमा छरिएर रहेको पुँजी र बैंकको पहुँच बाहिर रहेका विपन्न वर्गलाई समेटी उनीहरुको आर्थिक रुपान्तरणमा सहकारीहरुको योगदान अत्यन्त महत्वपूर्ण रहेको बताएका छन् । 
अहिले सहकारी अभियानले ग्रामीण र शहरी क्षेत्रमा तीव्र्रता पाएको भन्दै प्रदेश प्रमुख शर्माले विशेषतः ‘सबैका लागि एक र एकका लागि सबै’ भन्ने मूल ध्येयका साथ यो अभियान अगाडी बढिरहेको उल्लेख गरेका छन् । सहकारी अभियानले नागरिक सवलीकरणमा योगदान पु¥याइरहेको प्रमुख शर्माको भनाई छ ।