मागको तेब्बरले मात्रै इपीएस आवेदन भर्न पाउने

९ बैशाख, काठमाडौं । कोरियामा रोजागरका लागि जान चाहनेहरुमध्ये मागको तेब्बर संख्यामा मात्रै आवेदन दिन सकिने भएको छ । यसअघि कोरिया जान चाहने सबैले ईपीएसको भाषा परीक्षाका लागि आवेदन दिन पाउने गरेकोमा नयाँ व्यवस्था अनुसार कामदार कोटा संख्याको तेब्बर आवेदकले मात्रै ईपीएसको आवेदन भर्न पाउने भएका हुन् ।
ईपीएस परीक्षाका लागि आवेदन प्रणाली मात्रै परिवर्तन गरिएको बताउँदै ईपीएस कोरिया शाखा प्रमुख कमल श्रेष्ठले कोरियाले माग गरेको कामदार संख्याको तेब्बरसम्म आवेदन परेमा त्यसपछिकाले आवेदन भर्न नपाउने र सिस्टम आफैं बन्द हुने बताए । कामदारको माग भन्दा अत्याधिक मात्रामा आवेदन पर्ने भएकाले नयाँ व्यवस्था लागु भएको जनाईएको छ । यसअघि कामदारको माग भन्दा १० गुणा बढीसम्म आवेदकले आवदेन दिने गरेका थिए ।
कोरियाले नेपालबाट मेन्युफेक्चरिङ, सीपबिल्डिङ, कृषि तथा पशुपालन क्षेत्रमा कामदार लैजाँदै आएकोमा अब फरेस्ट्री, सर्भिस र रुट इन्डस्ट्रिज सेक्टलाई पनि थप्न प्रस्ताव गरिएको छ । एक वर्षमा कुनै एउटा सेक्टरमा मात्रै आवेदन दिन मिल्ने व्यवस्था गरिएको छ ।
गत मंसिरमा १५ हजार कामदारको कोटामा १ लाख ६४ हजार ७१६ जनाको आवेदन परेकोमा उनीहरुलाई ३ चरणमा परीक्षा दिलाउने व्यवस्था मिलाइएको छ ।