मउवा संघले बुझायो स्थानीय तहमा कृषिका सुझाव

३१ जेठ, हेटौंडा । जिल्लाका उद्योगी व्यवसायीहरुको साझा संस्था मकवानपुर उद्योग वाणिज्य संघले जिल्लाका सबै स्थानीय तहमा कृषि सम्बन्धी सुझावसहितको अवधारणापत्र बुझाएको छ । 
भीमफेदी बाहेक मकवानपुर जिल्लाका सबै पालिकाहरुमा फरक फरक मितिमा पालिकाको कार्यालयमै पुगेर सुझाव पेश गरेको हो । भीमफेदी गाउँपालिकाका अध्यक्ष, उपाध्यक्षलाई भने हेटौंडामै आएको बखत प्रस्तुतीकरणसहित अवधारणापत्र बुझाइएको हो । 
पहिलो चरणमा कैलाश, राक्सिराङ र मनहरी, दोस्रो चरणमा बकैया र बागमती, तेस्रो चरणमा मकवानपुरगढी, चौथो चरणमा थाहा र इन्द्रसरोवर, पाँचौं चरणमा भीमफेदी र छैठौं चरणमा हेटौंडा उपमहानगरपालिकालाई सुझाव पेश गरेको हो । 
मकवानपुर उद्योग वाणिज्य संघ अन्तर्गत रहेको कृषि प्रवद्र्धन समितिले तयार गरेको अवधारणापत्रले पालिकाको कृषि सम्बन्धी नीति निर्माणमा मद्दत पुग्ने विश्वास लिइएको छ । यसबाट स्थानीय कृषकहरु लाभान्वित हुने अपेक्षा समेत गरिएको छ । 
हेटौंडा उपमहानगरपालिकाका मेयर मीनाकुमारी लामाले नगर कार्यपालिकाको कार्यालयमा बुधबार कृषि सम्बन्धी सुझावसहितको अवधारणा पत्र ग्रहण गरेकी हुन् । मउवा संघका सहकोषाध्यक्ष तथा कृषि प्रवद्र्धन समितिका संयोजक निलम पाण्डेले कृषि सम्बन्धी अवधारणापत्र बुझाएकी हुन् । 
कार्यक्रममा संघका कार्यसमिति सदस्य दिवस पराजुली, सितादेवी भेटवाल र कृषि प्रवद्र्धन समितिका सदस्य ठूलीमाया मोक्तान लगायतको उपस्थिति थियो । संघको टोलीले पालिकामा पुगेर कृषिको अवस्था बुझ्दै आवश्यक सुझाव समेत दिँदै आएको थियो ।