राजनीति र पेट्रोलियम व्यवसायसंगै कृषि कर्ममा जोडिदै इटेनी

३ भदौ, हेटौंडा । मकवानपुरको हेटौंडामा व्यवसाय गर्दै राजनैतिक क्षेत्रमा सक्रिय नेता उत्सव इटेनीको दिनचर्या यति बेला घाँस, पराल र चोक्करसंग जोडिएको छ । राजनैतिक भाषणमा युवाले कृषि क्रान्ति गरि देशमै सुन फलाउनुपर्छ भनेर मन्तव्य दिने गरेका इटेनी आफ्नो भाषणलाई व्यवहारमा उतार्दै यतिबेला आफ्नो समय कृषि फार्ममा लगाइरहेका छन् ।
नेपाली कांग्रेस हेटौंडा नगर सभापति समेत रहेका इटेनीले हेटौंडा-१२ आल्दमारमा आफ्नो भाईको नाममा इटेनी एग्रो फार्म प्रालि स्थापना गरेका छन् । २ करोड लगानीमा स्थापना भएको फार्ममा २८ वटा लैनो भैसी, ३ वटा गाई, एउटा राँगो र पाडापाडी गरेर ५५ पशुचौपाया छन् ।
उनले दैनिक ३०० लिटर दुध १ सय १०  रुपैयाँको दरले बिक्री गरी मासिक करिब १० लाख रुपैंयाँको कारोबार गर्छन् । ‘५/७ वटा भैंसीबाट शुरु गरेको व्यवसाय अहिले २८ वटा दुहुनो भैंसी, राँगा, पाडापाडि गरेर ५०/६० सम्म पुगेको छ, ५ जनाले रोजगार पाएका छन्, उपभोक्ताले शुद्ध दुध पाएका छन्, हामीले खेतका लागि मल पाएका छौं ’-इटेनीले भने ।
बजारका लागि कुनै समस्या नरहेको बताउने उनले यहाँ उत्पादित भैंसीको दुध फार्ममै लिन पनि आउने गरेका छन् भने स्थानीय सहकारीले खरिद गर्ने गरेको बताए । पशुचौपायाको हेरचाह तथा घाँस कुडो पानीको व्यवस्थापनमा खटिने ५ जना कामदारको पारिश्रमिक र अन्य खर्चसहित मासिक खर्च करिब ५ लाख रूपैयाँ छ । भैंसीलाई आवश्यक पर्ने पराल, चोकर मधेश र साइलेज चितवनबाट ल्याउने गरेको बताए ।
पेट्रोलियम व्यवसायमा लामो समयदेखि सक्रिय इटेनी देशलाई दुग्धजन्य पदार्थमा आत्मनिर्भर बनाउनका लागि सरकारले विदेशिने युवाहरुलाई रोक्न र पशुपालनमा सक्रिय बनाउन स्पष्ट नीति ल्याउनुपर्ने बताए । अहिलेको नीति कृषकमैत्री नरहेको आफुले यो काम थालेपछि बुझेको बताउँदै अब आफुले भेट्ने मन्त्री र सांसदहरूलाई यसबारे अवगत गराउने उनको भनाई छ ।
उनले मेहनतका साथ काम गरेमा सफलता हासिल हुने विश्वास साथ फर्म स्थापना गरेका छन् । आफुलाई चिन्नेहरूले उत्सव धेरै दिन एग्रो फार्ममा टिक्दैन भन्ने गरेको भन्दै उनले आफुले दिर्घकालिन उद्धेश्यसहित फर्मको भौतिक संरचनासहित अन्य व्यवस्थापन गरेको बताए । आफ्नो पुर्ख्यौली जग्गा खेर गइरहेकोमा यसलाई सदुपयोग गरेकोमा घर परिवार र आफन्तबाट सकारात्मक प्रतिक्रिया पाएका उनले बाँझो खेतमा फार्मका लागि आवश्यक घाँस र अन्य बाली लगाउने सोच बनाएका छन् । 
राजनीति कार्यकर्ता भाषणमा मात्रै नभई आर्थिक पक्षमा पनि सबल रहनुपर्ने बताउँदै उनले अनैतिक कामबाट आर्जन गर्नु भन्दा यस्तै व्यवसायबाट आफुलाई आर्थिक उपार्जनको क्रियाकलापमा जोड्नुपर्ने उनको भनाई छ । आफ्नो राजनीतिक यात्रा र अन्य व्यवसायसंगै कृषि कर्मलाई पनि संगसंगै लैजाने इटेनीको लक्ष्य छ ।

राजनीति र पेट्रोलियम व्यवसायसंगै कृषि कर्ममा जोडिदै इटेनी (भिडियो)