कांग्रेस-एमाले बागमती प्रदेशस्तरीय संयन्त्रले गर्यो ५ बुँदे निर्णय

२३ मंसिर, हेटौंडा । नेपाली कांग्रेस र नेकपा (एमाले) बीच बनेको बागमती प्रदेश स्तरीय दुई दलीय संयन्त्रको बैठकले ५ बुँदे निर्णय गरेको छ । आइतबार ललितपुरमा बसेको दुई दलीय संयन्त्रको बैठकले ५ बुँदे निर्णय गरेको हो । 
बैठकले बागमती प्रदेश सरकारले गरेका निर्णयहरुलाई यथाशिघ्र कार्यन्वयन गर्दै प्रदेश सरकारलाई जनचाहना अनुरुप प्रभावकारी ढंगले संचालन गर्न बागमती प्रदेश सरकारलाई निर्देश गरेको छ । बैठकले बागमती प्रदेशमा बाँकी रहेका राजनीतिक नियुक्तिहरुलाई दुई दलको आपसी सहमतिमा यथाशिघ्र टुंग्याउन बागमती प्रदेश सरकारलाई यस बैठक निर्देश गरेको छ । 
त्यस्तै, गत असोज ११ देखि १३ गतेसम्म आएको बर्षात र बाढीबाट बागमती प्रदेशभित्रका क्षति भएका सम्पुर्ण संरचनाहरुलाई पुर्ननिर्माण र बिस्थापितहरुको पुर्नस्थापना गर्नका लागि आवश्यक बजेट व्यवस्था गरी यथाशिघ्र कार्यान्वयन गर्न संयन्त्रले बागमती प्रदेश सरकारलाई निर्देश गरेको छ । संयन्त्रले बागमती प्रदेश भित्र रहेका समस्याग्रस्त सहकारीहरुको यथार्थ अवस्था पहिचान गरी सहकारीमा भएको कारोबारका कारण कोहि पनि सदस्य पीडित नहुने आवश्यक व्यवस्था गर्न बागमती प्रदेश सरकारलाई निर्देश गरेको छ । 
त्यस्तै, ‘स्थानीय तहको उप-निर्वाचन, २०८१' शान्तिपूर्ण, निष्पक्ष एवं उत्साहपुर्ण रुपमा सम्पन्न गर्न-गराउन महत्वपुर्ण भुमिका खेलेकोमा नेपाल सरकार, निर्वाचन आयोग, राष्ट्रसेवक कर्मचारी, सुरक्षा निकाय, राजनीतिक दल, संचारकर्मी तथा पर्यवेक्षक र मतदाता आमाबुबा, दिदीबहिनी तथा दाजुभाईहरुमा बागमती प्रदेश स्तरीय दुई दलीय संयन्त्रले हार्दिक धन्यवाद एवं आभार प्रकट गरेको छ ।
बागमती प्रदेश स्तरीय दुई दलीय संयन्त्रका संयोजक नेपाली कांग्रेस बागमती प्रदेश सभापति ईन्द्रबहादुर बानियाँको सभापतित्वमा बसेको बैठकमा नेपाली कांग्रेसको तर्फबाट बागमती प्रदेश सरकारका मुख्यमन्त्री बहादुर सिंह लामा र बागमती प्रदेश कार्यसमितिका उपसभापति चन्द्र महर्जन, नेकपा एमालेका तर्फबाट नेकपा एमाले बागमती प्रदेश ईन्चार्ज राजन भट्टराई, बागमती प्रदेश अध्यक्ष कैलाश ढुंगेल,  एमाले बागमती प्रदेश संसदीय दलका नेता र जगन्नाथ थपलियाको सहभागिता रहेको संयन्त्रका सचिव राजु नेपालले जानकारी दिए ।