अनुपम घलान स्मृति हेटौंडा नगर स्तरीय फुटबल फागुन ७ मा

२५ माघ, हेटौंडा । असोज १२ गते मकवानपुरको इन्द्रसरोवर ३ पहिरो परेर ज्यान गुमाएको हेटौंडा–१२ का बालफुटबलर अनुपम घलानको स्मृतिमा हेटौंडा नगरस्तरीय फुटबल प्रतियोगिता हुने भएको छ ।

घलानको स्मृतिमा हेटौंडा उपमहानगरपालिका खेलकुद विकास समितिले १६ वर्षमुनिका खेलाडीहरु सहभागि रहने गरी  अनुपम घलानको स्मृतिमा हेटौंडा नगरस्तरीय फुटबल प्रतियोगिता आयोजना गर्ने भएको हो।शुक्रबार पत्रकार सम्मेलन मार्फत  फागुन ७ गतेदेखि हेटौंडा–५ मा रहेको क्याम्पा रंगशालामा प्रतियोगिता आयोजना गरिने जनाइएको हो। 

पत्रकार सम्मेलनमा हेटौंडा नगर खेलकुद विकास समितिका अध्यक्ष रवीन्द्र घिमिरेले प्रतियोगितामा प्रथम हुने टिमले नगद १ लाख र द्वितीय हुने टिमले ७० हजार राशिको पुरस्कार प्राप्त गर्ने र विधागत् पुरस्कारतर्फ सर्वोत्कृष्ट खेलाडीले ५ हजार, उत्कृष्ट फरवार्डले १० हजार, उत्कृष्ट किपरले ५ हजार, उत्कृष्ट प्रशिक्षकले ५ हजार र उत्कृष्ट डिफेन्सले ५ हजार नगद राशिको पुरस्कार प्राप्त गर्ने बताएका थिए। 

।खेल सञ्चालनका लागि हेटौंडा उपमहानगरपालिकाले ७ लाख विनियोजन गरेको छ । खेलमा अन्तर्राष्ट्रिय फुटबल महासंघ (फिफा) को नियमानुसार नकआउट प्रतियोगिता हुनेछ ।खेललाई आगामी वर्षहरुमा पनि निरन्तरता दिने गरी यस वर्ष सुरु गरिएको समिति अध्यक्ष रवीन्द्र घिमिरेले बताए । सहभागी हुन चाहने टिमले फागुन ४ गतेभित्र नगरपालिका खेलकुद विकास समितिमा टिम दर्ता गराउनुपर्नेछ । खेलमा १९ वटै वडाका इच्छुक खेलाडीले सहभागिता जनाउन सक्नेछन् । वडाबाट सिफारिस भएका १६ वर्ष ननाघेका खेलाडीले प्रतियोगितामा सहभागिता जनाउन पाउने छन्। असोज १२ गते पहिरोमा परेर इन्द्रसरोवर ३ मा रहेको वत्सला देवि माध्यमिक विद्यालयमा रहेर  यु–१४ क्याम्पका ४० खेलाडीमध्ये  फुटबल प्रशिक्षण लिइरहेका अनुपमसंगै ६ जना एन्फाका खेलाडीहरुको ज्यान गएको थियो ।