हेटौंडामा हुने व्यापार महोत्सवको उदघाटन गृहमन्त्रीले गर्ने, पहिलो दिन प्रवेश निःशुल्क

महोत्सव बारे जानकारी दिन आयोजित पत्रकार सम्मेलन

५ फागुन, हेटौंडा। फागुन ६ गतेबाट १८ गते सम्म हेटौंडा १० को टिसिएनचौरमा हुने दोस्रो राष्ट्रिय निर्माण तथा व्यापार महोत्सव–२०८१को उदघाटन गृहमन्त्री रमेश लेखकले गर्ने भएका छन्। सोमबार महोत्सव स्थलमा पत्रकार सम्मेलनको आयोजना गर्दै निर्माण व्यवसायी संघ मकवानपुरका अध्यक्ष बालगोपल कँडेलले यस बारे जानकारी गराएका हुन्। ६ फागुनदेखि १८ गते सम्म निर्माण व्यवसायी संघ मकवानपुरद्वारा आयोजित ‘दोस्रो राष्ट्रिय निर्माण तथा व्यापार महोत्सव–२०८१’ को  उद्घाटन गृहमन्त्री लेखकले गर्ने महोत्सव प्रचार प्रसार संयोजक सुरज बर्तौलाले बताएका छन् ।
गृहमन्त्री लेखकले मंगलबार बिहान ११:३० बजे महोत्सव उद्घाटनको कार्यतालिका रहेको बर्तौलाले जनाएका छन्। महोत्सव उदघाटन पुर्व हेटौंडा ४ हुप्रचौरबाट शोभायात्रा सहित र्याली सुरु हुने र नगरको परिक्रमा गरी महोत्सव स्थलमा पुगेर टुङ्गिने शोभायात्रा समितिका संयोजक भवनाथ अधिकारीले जानकारी दिएका छन्। यता आयोजकले महोत्सवमा उद्घाटनको दिन आगन्तुकको लागी प्रवेश निःशुल्क रहेको जनाएको छ।७ गतेबाट महोत्सव प्रवेशमा विद्यार्थीका लागि ५० रुपैयाँ र सर्वसाधारणका लागि ७५ रुपैयाँ शुल्क निर्धारण गरिएको प्रचार प्रसार संयोजक बर्तौलाले जनाएका छन्। शिवम् सिमेन्टको डिस्ट्रिक्ट पार्टनर सिप रहको महोत्सवमा  ३ सय २५ वटा  स्टल बुकिङ भइसकेको  पत्रकार सम्मेलनमा जनाइएको छ । महोत्सव स्थल बेलुही झै सिङ्गारिएको छ। 
महोत्सवमा निर्माण उपकरण तथा सामग्रीहरुको प्रदर्शनी एवम् बिक्री, बहुराष्ट्रिय कम्पनीहरुको उत्पादनको प्रदर्शनी एवम् बिक्री, सूचना प्रविधि प्रदर्शनी तथा मनोरञ्जनात्मक बाल उद्यान, कृषि उत्पादनको प्रदर्शनी तथा कृषि प्रतियोगिता, दैनिक राष्ट्रिय तथा स्थानीय कलाकारहरुको प्रस्तुती, शैक्षिक, घरजग्गा, अटो तथा खाना महोत्वस, नविनतम उपकरणहरुको प्रदर्शनी तथा नयाँ, नौलो प्रबिधिको प्रदर्शनी र गायन प्रतियोगिता हेटौंडा आइडल लगायतको आकर्षणहरु रहेने बताइएको छ ।महोत्सव उद्घाटनका लागि गृहमन्त्री लेखक हेलिकोप्टर मार्फत हेटौंडा आउनेछन्।