दिगो शान्ति र सुशासनका लागि अहिलेको समिकरण:गृहमन्त्री लेखक

६ फागुन, हेटौंडा। गृहमन्त्री रमेश लेखकले दिगो शान्ति र सुशासनको यात्रालाई अगाडि बढाउन अहिलेको कांग्रेस, एमालेको समीकरण निर्माण भएको बताएका छन्।
मंगलबारदेखि हेटौंडा १० टिसिएनचौरमा सुरु भएको दोश्रो राष्ट्रिय निर्माण तथा व्यापार महोत्सव २०८१को उद्घाटन कार्यक्रमलाई सम्बोधनका क्रममा गृहमन्त्री लेखकले देशमा समृद्धि र सुशासन कायम गर्न कांग्रेस, एमालेको वर्तमान सत्ता समीकरण बनेको बताएका हुन्। 

उदघाटन कार्यक्रमलाई सम्बोधन गर्दै उनले वर्तमान सरकारको प्रमुख उदेश्य संविधानको रक्षा गर्दै संघीय लोकतान्त्रिक गणतन्त्रात्मक व्यवस्थालाई  सुदृढ गर्नु रहेको बताए।गृहमन्त्री लेखकले  आर्थिक गतिविधिहरुलाई चलायमान बनाउन सरकार प्रतिबद्ध रहेको समेत दावी गरे।

"अहिलेको सरकार बनेपछि  व्यवसायीहरुको भुक्तानी प्रक्रिया सुरु भइरहेको छ,अब सम्पूर्ण निर्माण व्यवसायीहरुले काम गरेपछि भुक्तानी नहोल भन्न परेन तपाईँहरु लगनशील भएर काम लाग्नुस" - मन्त्री लेखकले भने।उनले सरकार निर्माण व्यवसायीको समस्याप्रति गम्भीर रहेको उद्घोष गरेका थिए।

फागुन १८ गतेसम्म चल्ने महोत्सवमा ३२५ स्टल रहेको र महोत्सव प्रवेशका लागि विद्यार्थीलाई ५० र सर्वसाधारणका लागि ७५ रुपैयाँ शुल्क निर्धारण गरिएको छ।