कमानेमा भेट डाईनोसिस सेन्टर सञ्चालनमा

Google Photo

१० फागुन, हेटौँडा । मकवानपुरका कुखुरा व्यवसायीहरुको समस्यालाई ध्यानमा राख्दै हेटौंडाको कमानेमा कुखुराको औषधि पसल मकवानपुर भेट डाइनोसिस सेन्टर सञ्चालनमा ल्याइएको छ । 
कुखुरा व्यवसायी संघ मकवानपुरका अध्यक्ष राजु अधिकारीसहित पोल्ट्री व्यवसायीहरु दलबहादुर खड्का, वीरेन्द्रबहादुर खत्री, बासु भण्डारी, रामशरण गौतम र शिवराम पराजुलीको संयुक्त लगानीमा सञ्चालित भेट डाइनोसिस सेन्टरको बिहीबार जिल्ला समन्वय समिति मकवानपुरका प्रमुख रघुनाथ खुलालले उद्घाटन गरेका हुन् । कार्यक्रमका प्रमुख अतिथि खुलालले निर्वाहमुखी कुखुरापालन गर्नु आवश्यक रहेको औंल्याए । कुखुरा पालनमै संकृय रहेकाहरुले सञ्चालनमा ल्याएको औषधि पसल भएकोले किसानले अन्तको भन्दा कम मुल्यमा औषधि पाउनुपर्ने सुझाव दिए । यस्तै मकवानपुर उद्योग वाणिज्य संघका अध्यक्ष कृष्ण कटुवालले नाफासंगै किसानको हितमा पनि ध्यान दिन सुझाव दिए । 
यस्तै नेपाली काँग्रेस मकवानपुरका कार्यबाहक सभापति बिष्णु लामिछानेले कुखुरा पालनसंग सम्बन्धित युवाहरुले सञ्चालनमा ल्याएको औषधि पसल भएकोले किसानले राहत महसुस गर्ने दावी गरे । यस्तै जिल्ला पशुसेवा कार्यालय मकवानपुरका डा. सञ्जीवकुमार ठाकुरले कुखुरामा देखिने समस्या लिएर चितवनसम्म जानुपर्ने अवस्थाको अन्त्य हुने बताए । उनले अन्यत्रको भन्दा सुलभ र सस्तो मुल्यमा कुखुरापालकलाई औषधि उपलब्ध गराउन सुझाव दिए । 
सञ्चालक राजु अधिकारीले नाफा कमाउन भन्दा पनि मकवानपुरका कुखुरा व्यवसायीको सहजताको लागि भेट डाइनोसिस सेन्टर सञ्चालनमा ल्याइएको जानकारी दिए । औषधी पसलमा चितवन र मकवानपुरका ६ जना पशु चिकित्सकले सेवा प्रदान गर्ने बताइएको छ । कार्यक्रममा मकवानपुर कुखुरा व्यवसायी संघका सदस्य एवम् किसान प्रतिनिधि श्यामसुन्दर परियार, सञ्चालक रामशरण गौतमलगायतले मकवानपुरका कुखुरा पालकलाई अब सहज हुने बताए ।