मकवानपुरको राक्सिराङको सबै वडामा पुग्यो विजुली

११ चैत, हेटौंडा। मकवानपुरको राक्सिराङ गाउँपालिका सबै (९) वटै वडामा राष्ट्रिय प्रसारण लाइनको विद्युत पुगेको छ। सोमबार एक कार्यक्रमका बिच चेपाङ बाहुल्य विकट गाउँ राक्सिराङका ९ वटै वडामा नेपाल विद्युत् प्राधिकरणले विद्युतको पहुँच पुर्‍याइएको हो। नेपाल विद्युत् प्राधिकरणका कार्यकारी निर्देशक कुलमान घिसिङले सोमबार एक समारोहका बिच राक्सिराङ गाउँपालिका–९, खैराङ पुगेर राक्सिराङलाई पूर्ण विद्युतीकरण वडा घोषणा गरेका हुन्। घिसिङले राक्सिराङ–९ खैराङकी फूलमाया चेपाङको घरको विद्युतको मिटर 'अन’ गरेर राक्सिराङलाई पूर्ण विद्युतीकरण वडा घोषणा गरेका हुन्।
गाउँपालिकाको पहलमा प्राधिकरणले ‘चेपाङ बिजुली अभियान अन्तर्गत राक्सिराङलाई राष्ट्रिय प्रशारण लाइनबाट वितरण गरिएको विद्युतको पहुँचमा जोडिएको हो। 

उक्त अभियानअन्तर्गत प्राधिकरणका कार्यकारी निर्देशक घिसिङले ३३० वटा विद्युत् मिटर राक्सिराङमा विभिन्न वडाका विपन्न चेपाङलाई निःशुल्क वितरण गरेका थिए।
कार्यक्रममा बोल्दै घिसिङले चेपाङलाई विद्युत् कार्यक्रममार्फत ३० करोड रुपैयाँमार्फत अभियानलाई अघि बढाएको बताएका छन् ।
यता गाउँपालिका अध्यक्ष राजकुमार मल्लले गाउँपालिकाले आफ्नै स्रोतमा सञ्चालन गर्दै आएको विद्युतीकरणको कामलाई प्राधिकरणले चेपाङलाई बिजुली कार्यक्रममार्फत सम्पन्न गरेकोमा खुसी व्यक्त गरे। उनले आफू पालिका अध्यक्षमा निर्वाचित भएपछिको राक्सिराङका सबै वडामा विद्युतको पहुँच पुर्याउने सपना साकार भएको जनाए। 
०७८ को जनगणनाअनुसार २५ हजार ९९६ जनसंख्या रहेको उक्त पालिकामा ५ हजार ४४ घरधुरी छन्।कार्यक्रममा दुर्गम पालिकाको घरघरमा विद्युतीकरण गर्न सहयोग पुर्‍याउने घिसिङलाई गाउँपालिकाले सम्मानसमेत गरेको थियो भने उक्त कार्यमा सघाउ पुर्‍याउने व्यक्तिलाई समेत सम्मान गरिएको थियो।