हेटौंडामा जमिन भास्सिएर हराएको गाडीको सम्भावित लोकेसन पत्ता लगाइयो

घटनास्थलमा अध्ययन गर्दै भूगर्भविद्को टोली

२३ बैशाख, हेटौंडा। हेटौंडा उपमहानगरपालिकाको वडा नम्बर १६ र १७ को सिमाना फाट्मा शुक्रबारबाट जमीन भासिएर हराइरहेको  ना ४ च ४८३३ नम्बरको योद्धा डिआइको सम्भावित लोकेसन पत्ता लगाइएको छ। 
सोमबार सम्म विभिन्न तरिकाले खोजी गर्दा फेला परेपछि हेटौंडा उपमहानगरपालिकाले काठमाडौंबाट भूगर्भविद् नारायण अधिकारी सहित ४ जनाको टोलीले बोलाएको थियो। टोली मंगलबार बिहानबाट घटनास्थलमा खटिएका थिए।उनीहरुले प्रोटोन म्याग्नेटो मिटर, पावर अगर लगायतका विधि मार्फत घट्नास्थल आसपास अध्ययन गरेका थिए। 
माछाको दाना दिन हेटौंडा बजार जाँदै गर्दा जमिन भासिएर बेपत्ता भएको गाडी पत्ता लगाउन परिचालित भूगर्भविद्को टोलीले मंगलबार अपरान्ह सम्भावित लोकेसन फेला पारेका हुन् । प्रोटोन म्याग्नेटोमिटर प्रयोग गरी उक्त गाडीको सम्भावित लोकेसन पत्ता लगाइएको भूगर्भविद् कृष्ण पाण्डेले जानकारी दिएका छन्। 

उनका अनुसार गाडीमा चुम्बकीय वस्तु धेरै हुने भएकाले चुम्बकीय वस्तु पत्ता लगाउने प्रोटोन म्याग्नेटोमिटर प्रयोग गरिएको हो । गाडी जमिनमुनि भासिएर हराएको ठाउँको वरपर यसरी प्रोटोन म्याग्नेटोमिटर प्रयोग गर्दा एक ठाउँमा चुम्बकीय वस्तु रहेको सङ्केत अन्य स्थानको तुलनामा निकै बढी आएको उनले बताएका थिए । लोकेसनका आधारमा भासिएको स्थानको पूर्व पट्टी गाडी रहेको अनुमान गरिएको छ। यद्यपी गाडी भने फेला नपरेको जनाइएको छ।  घटनास्थलको अध्ययन गरिरहेका भूगर्भविद् नारायण अधिकारीले सो क्षेत्रको भुबनोट निकै कमजोर र तरलता युक्त रहेको छ।माथिल्लो भागमा केही माटो भरिएपनि तल्लो भागमा बालुवा तथा दलदल युक्त माटो रहेको  बताएका छन् । बुधबार थप अध्ययन पछि सवारी फसेको स्थान स्पष्ट हुने जनाइएको छ।