अछाम प्रहरीको सचेतनामुलक कार्यक्रम

१३ जेठ, मंगलसेन । जिल्ला प्रहरी कार्यालय अछामको आयोजनामा सचेतनामुलक कार्यक्रमको आयोजना गरिएको छ। 
जिल्लाको मंगलसेन नगरपालिका वडा नम्बर ८ स्थित श्री मंगला नेपाल माध्यमिक विद्यालयमा जिप्रका अछाम र सामाजिक विकास कार्यालय अछामको आयोजनामा सचेतनामुलक कार्यक्रमको आयोजना गरिएको हो। 
सामाजिक विकास कार्यालय अछामका प्रमुख डम्बर बहादुर रावलको अध्यक्षतामा, विद्यालय व्यवस्थापन समितिका अध्यक्ष  रमेश रावल र  विद्यालयका प्रधानाध्यापक मिन बहादुर भण्डारीको आतिथ्यतामा
 कार्यक्रम सम्पन्न भएको हो। 
कार्यक्रममा अछाम प्रमुख प्रहरी नायव उपरीक्षक ईश्वरी प्रसाद भण्डारीले सामुदायिक प्रहरी साझेदारी कार्यक्रम अन्तर्गत वालबिबाहको परिचय, वालविवाहको असर, कानूनी कारवाही, बहुबिबाह, बहुविवाह गरेमा वा गराएमा हुने कानूनी सजाय, यौन दुर्व्यवहार, यौन दुर्व्यवहार गरेमा हुने सजाय, घरेलु हिंसा, घरेलु हिंसा गरेमा हुने कानूनी सजाय तथा छाउपढी प्रथा न्युनिकरणका उपायहरु र कानुनी व्यवस्था सम्बन्धमा सहजिकरण गरेका थिए।
कार्यक्रममा अभिभावक, जनप्रतिनिधी, विद्यालयका शिक्षक / शिक्षिकाहरु र  विद्यालयमा  कक्षा ९ देखि ११ मा अध्ययनरत करिब ५७ जना विद्यार्थीहरूको सहभागिता रहेको थियो।