बागमती प्रदेशसभाको बैठक फेरि स्थगित

१६ असार, हेटौंडा । बागमती प्रदेशसभाको बैठक फेरि स्थगित भएको छ । आर्थिक वर्ष २०८२/०८३ को बजेट तथा कार्यक्रममाथि छलफल हुने भनी दिउँसो १ बजेका लागि बोलाइएको बैठक बस्दै नबसी स्थगित भएको हो ।
दिउँसो १ बजे बस्ने भनिएको बैठक सूचना जारी गरेर अपरान्ह ४ बजेका लागि सारिएकोमा बस्दै नबसी सूचना जारी गरेर स्थगित भएको छ ।
प्रदेशसभा सचिवालयले 'विशेष कारण' असार १९ गते बिहिबार बिहान ११ बजे बस्ने सभा सचिव रामकुमार पौडेलद्वारा जारी सूचनामा उल्लेख छ ।
प्रदेश सरकारले असार १ गते ल्याएको बजेटबारे सत्तापक्ष र प्रतिपक्ष दुबैतर्फ असन्तुष्टि छ । बजेट निश्चित मन्त्री र नेताको कब्जामा परेकाले असन्तुलित विनियोजन भएको सांसदहरूको भनाई छ । उनीहरूले बजेटमा विचौलिया र कर्मचारी हावी हुँदा कमिसनका आधारमा बजेट आरोप लगाएका छन् ।
उनीहरुले संसदमा आफ्नो धारणा राख्ने क्रममा सरकारमाथि सतुलित बजेटका लागि बजेट संशोधनका लागि दबाब सिर्जना गर्ने बताएका छन् ।
पटक पटक बजेटबारे छलफल भएपनि सहमति नजुट्दा संसदमा बजेटबारे छलफल अघि बढ्न सकेको छैन ।
बागमती सरकारले आगामी आर्थिक वर्ष २०८२/०८३ का लागि कुल ६७ अर्ब ४७ करोड ७३ लाख रुपैयाँको बजेट सार्वजनिक गरेको छ ।