४३ औँ बीपी स्मृति दिवस मनाईदै

६ साउन, हेटौंडा । नेपाली कांग्रेसका संस्थापक विश्वेश्वरप्रसाद कोइरालाको ४३ औँ स्मृति दिवस आइतबार देशभरि विभिन्न कार्यक्रम गरी मनाइदैछ । नेपाल कांग्रेस र उसका भातृ तथा शुभेच्छुक संस्थाहरूले दिवसमा विभिन्न कार्यक्रम गर्दैछन् ।
प्रथम जननिर्वाचित प्रधानमन्त्री बिपी कोइराला प्रजातान्त्रिक समाजवादका चिन्तक थिए । उनले नेपालमा राष्ट्रियता, प्रजातन्त्र र समाजवाद स्थापनाका लागि राजनीतिक नेतृत्व प्रदान गरेका थिए । प्रधानमन्त्रीत्वकालमा उनले बिर्ता उन्मूलन र ‘जग्गा जोत्नेको हुनुपर्छ’ भन्ने भूमिसुधार कार्यक्रम अगाडि बढाएका थिए ।
बीपीले स्वतन्त्र रूपमा चिन्तन, आयाम, परम्परा र शैली दिएर साहित्यका माध्यमबाट नेपाली वाङ्मयलाई शिखरमा पुर्याउन पनि उनले योगदान गरेका थिए । नेपाली साहित्यमा मनोवैज्ञानिक यथार्थवादी धाराका प्रवर्तक कोइरालाका डेढ दर्जन कृति प्रकाशित छन् ।
बिपी १९७१ भदौ २४ गते जन्मिएका हुन् । २०१५ सालको आमनिर्वाचनमा कांग्रेसले दुईतिहाइ मत प्राप्त गरेपछि उनी देशको पहिलो जननिर्वाचित प्रधानमन्त्री बने । २०१७ पुस १ गते तत्कालीन राजा महेन्द्र शाहले उनलाई अपदस्थ गरी पञ्चायती व्यवस्था लागु गरेपछि उनी आठ वर्ष जेल बसे र रिहा भएपछि उनी निर्वासनमा भारत गए । 
२०३३ मा राष्ट्रिय मेलमिलापको नीति लिएर उनी स्वदेश फर्किए । राणाशासनदेखि पञ्चायती व्यवस्थासम्म अनवरत संघर्ष गरेका कोइराला क्यान्सर रोगबाट पीडित थिए । उनको निधन २०३९ साउन ६ गते भएको थियो ।