मेयरकपमा वडा नम्बर १२ र ११ विजयी

२१ फागुन, हेटौँडा । हेटौँडामा जारी तेस्रो संस्करणको मेयरकप फुटबल प्रतियोगिता अन्तर्गत आज वडा नम्बर १२ र वडा नम्बर ११ विजयी भएका छन् । पहिलो खेलमा १२ नम्बर वडाले ५ नम्बर वडालाई २–१ को गोल अन्तरले पराजित गर्दै विजयी हासिल गरेको छ । खेलको ३७ र ५९ औँ मिनेटमा अशोक घलान र सुरज पाख्रिनले १÷१ गोल गरेका हुन् । ५ नम्बर वडाको तर्फबाट एन्जल महर्जनले खेलको ६९ मिनेटमा गोल फर्काए पनि खेलको निर्धारित समयमा अरु गोल हुन नसकेपछि १२ नम्बर वडा विजयी भएको हो । खेलको म्यान अफ दि म्याच वडा नम्बर १२ का सुचन लोप्चन घोषित भए । दोस्रो खेलमा १४ नम्बर वडालाई १–० गोल अन्तरले पराजित गर्दै ११ नम्बर अघिल्लो चरणमा प्रवेश गरेको छ । खेलको ४८ औं मिनेटमा अजय क्षेत्रीले गरेको गोलमार्फत वडा नम्बर ११ विजयी भएको हो । खेलको म्यान अफ दी म्याच अजय क्षेत्री नै घोषित भए । भोली ८ नम्बर वडा र १७ नम्बर वडाबीच पहिलो खेल हुनेछ भने १६ नम्बर वडा र १३ नम्बर वडाको बीच दोस्रो खेल हुनेछ । २९ गतेसम्म सञ्चालन हुने प्रतियोगिताको विजेताले नगद एकलाख ५० हजार तथा उपविजेताले ७५ हजार रुपैंया प्राप्त गर्नेछ । यस्तै प्रतियोगिताको उत्कृष्ट खेलाडीलाई नगद १५ हजार र विधागत उत्कृष्ट खेलाडीलाई ७ हजार ५ सय रुपैंयासहित ट्रफी प्रदान गरिनेछ ।