अझै खुलेन कुलेखानी - सिस्नेरी दक्षिणकाली सडकखण्ड

२ भदौं, हेटौंडा । शनिबार बिहान खसेको पहिरोको कारण अवरुद्ध बनेको कुलेखानी - सिस्नेरी - दक्षिणकाली सडकखण्ड अझै खुल्न सकेको छैन। सडकखण्ड अन्तर्गत इन्द्रसरोवर गाउँपालिका–३ ज्यामिरेमा पहिरो खसेको थियो।
आइतबार बिहानबाट ३ वटा हेव्वी इक्यूपमेन्टको प्रयोग गरी पहिरोले अवरुद्ध सडक खुलाउन प्रयास गरेतापनि सोमबार बिहानसम्म सो कार्य सम्भव नदेखिएको हो। आइतबार साँझ सम्म लगभग पहिरो पन्छाइएपनि आइतबार राति र सोमबार बिहान पुनः पहिरो खसेपछि खुलाउने अन्तिम तयारीमा रहेको सडकखण्ड अवरुद्ध बनेको छ। प्रदेशको भौतिक पूर्वाधार विकास मन्त्रालयले जेसिबी, एक्स्काभेटर र लोडर प्रयोग गरी सडक खुलाउने प्रयास  सोमबार बिहानैबाट सुरु गरेतापनि माथिबाट निरन्तर ढुंगा–माटो खसिरहेकाले कठिनाइ भइरहेको प्रदेश राजधानी पूर्वाधार विशेष आयोजनाका प्रमुख देवनारायण यादवले जानकारी दिएका छन्। सडक साँघुरो र जोखिमयुक्त भएकाले थप मेसिन प्रयोग गर्न सक्ने अवस्था नरहेको यादवले जानकारी दिए । पुनः पहिरो नखसे सोमबार साँझसम्म बाटो खुल्ने जनाएका छन्। 
यता सो मार्ग अवरुद्ध बनेपछि  भीमफेदी–कुलेखानी–सिस्नेरी–दक्षिणकाली जान  डाभर्सनमार्गको व्यवस्था गरि यातायात सञ्चालनमा ल्याइएको छ ।