हेटौंडामा भएको सवारी दुर्घटनामा श्रीमतीको मृत्यु, श्रीमान घाइते

७ भदौ, हेटौंडा। मकवानपुरको हेटौंडामा शनिबार अपरान्ह भएको सवारी दुर्घटनामा एक महिलाको मृत्यु भएको छ भने अर्का एक व्यक्ति घाइते भएका छन्।

पुर्व पश्चिम राजमार्ग अन्तर्गत हेटौंडा ९ पशुपतिनगरमा हेटौँडा बजार तर्फ आउदै गरेको बागमती प्रदेश ०२-०४५प ५५९७ नम्बरकाे मोटरसाइकल र विपरीत दिशाबाट आइरहेको बागमती प्रदेश ०३-००५ प ९०६९ नम्बरकाे मोटरसाइकल एक आपसमा ठक्कर खाई दुर्घटना हुँदा मोटरसाइकल चालक पर्साको विरगंज १३ मुर्ली बस्ने अन्दाजी ४८ वर्षीय प्रविण श्रेष्ठ र मोटरसाइकलमा सवार निजको श्रीमती अन्दाजी ४३ वर्षीया कविता जोशी श्रेष्ठ घाइते भएका थिए।  जोशी सवार मोटरसाइकल र अर्को मोटरसाइकल एक आपसमा ठक्कर खादा पल्टिदा जोशीको टाउको  सोही दिशाबाट आउदै गरेको ना ७ ख ५०१० नम्बरको बसमा ठोक्किन पुग्दा गम्भिर घाइते भएकी थिइन् । गम्भीर घाइते उनको उपचारको क्रममा हेटौंडा अस्पतालमा ज्यान गएको मकवानपुरका निमित्त प्रहरी प्रमुख प्रहरी नायव उपरीक्षक श्यामु अर्यालले जनाएका छन् । ठक्कर दिने मोटरसाइकल, बस र दुवै सवारी चालकलाई प्रहरीले नियन्त्रणमा लिइसकेको जनाइएको छ। दुर्घटनामा घाइते श्रेष्ठको हेटौंडा अस्पतालमा उपचार भइरहेको जनाइएको छ।