भिमफेदी कारागारमा मध्यरातमा झडप, २६० कैदी भागे

२५ भदौ, हेटौँडा। मकवानपुरकाे भिमफेदीमा रहेको क्षेत्रीय कारागार भीमफेदीबाट २६० जना कैदीबन्दी फरार भएका छन्।
मध्य रातमा  कारागारकाे ‘क’ ब्लकमा रहेका ५०० बढी  केदीबन्दीहरूले तीन वटा गेट फुटाउने  प्रयास गर्दा कारागार सुरक्षार्थ खटेको सशस्त्र प्रहरी र प्रहरीले हवाई फायर गरेको थियो।हवाई फायर गर्दा पनि कैदीबन्दीले कारागारकाे पश्चिम तर्फकाे पर्खाल भत्काएर भागेका हुन् ।उक्त ब्लकमा ५ सय भन्दा बढी कैदीबन्दी रहेकाेमा करिब २६० भागेको र अरूलाई  नियन्त्रणमा लिएर फर्काइएकाे थियो ।
सुरक्षाकर्मी र कैदीबन्दीबीच लगातार ४ घण्टासम्म झडप समेत भएको बुझिएको छ। झडपमा प्रशासनको बा १ झ ३६३४ नम्बरको जिपमा पनि तोडफोड भएको छ। कार्यालयको फर्निचर, कम्प्युटर लगायतका सामान सबै जलेर नष्ट भएको छ। झडप सुरु भए लगत्तै नेपाली सेना कारागार पुगेको थियो।झडपमा सेनाले चलाएकाे गाेली लागेर दुई जना कैदीबन्दी घाइते भएका छन् । उनीहरूकाे हेटाैंडा अस्पतालमा उपचार भइरहेकाे छ । कारागारकाे गाडी लिएर भाग्ने क्रममा टायरमा गाेली चलाउँदा कैदीबन्दीलाई लागेको जनाइएको छ ।कैदीबन्दीहरूले कारागारमा ताेडफाेड र आगजनी समेत गरेका छन् ।  कारागारकाे अर्काे ‘ख’ ब्लक भने सुरक्षित रहेकाे कारागार प्रमुख पाैडेलले बताएका छन्।स्थिती नियन्त्रणमा लिन सेनाले २०० बढी हवाई फायर गरेको थियो।