अझै खुलेन मुग्लिन नारायणगढ सडक:बैकल्पिक मार्ग प्रयोग गर्न प्रहरीको अनुरोध

४ असोज, हेटौंडा। शक्रवार साँझबाट अवरुद्ध बनेको 
 मुग्लिन नारायणगढ सडकखण्ड अझै खुल्न सकेको छैन ।

शुक्रबार साँझ सडकखण्ड अन्तर्गत चितवनको इच्छाकामना गाउँपालिका वडा नम्बर ५ तुइनखोला पुल नजिक सुख्खा पहिरो खस्दा सडकखण्ड दुइतर्फी अवरुद्ध बनेको छ। रातभर सडकखण्डको पहिरो हटाउन नसक्दा गए रातिबाटै चितवन तर्फ र मुग्लिन तर्फ सयौ सवारी बाटोमै होल्ड गरेर राखिएको छ भने बैकल्पिक मार्ग प्रयोग गर्न प्रहरीले अनुरोध गरिरहेको छ। 
यता सडक डिभिजन कार्यालय भरतपुरले बिहानैदेखि पहिरो हटाउने प्रयास भए पनि पहिरो खसिरहेकोले असम्भव भएको  जनाएको छ । कार्यालयका अनुसार मुग्लिन तर्फ २ वटा लोडर र एउटा एक्साभेटर र नारायणगढ तर्फ १/१ ओटा लोडर र एक्साभेटर प्रयोग गरेर 
पहिरो हटाउने काम भइरहेको तर्फ पहिरो खस्ने क्रम नरोकिएकोले अवरुद्ध सडक खुलाउन तत्काल असम्भव रहेको इलाका प्रहरी कार्यालय मुग्लिनका प्रहरी निरीक्षक प्रतिक सिंहले जानकारी दिएका छन् ।
रातिदेखि सडक अवरुद्ध बनेपछि चितवनका सिडिओ गणेश अर्याल र प्रहरी प्रमुख एसपी गोविन्द पुरी साथै सडक डिभिजन कार्यालयको टोली स्थलगत अवलोकनमा पुगेको थियो । सिडिओ, एसपीको टोलीले सडकखण्ड संचालनका लागि टोली रातिबाटै खटेको, पहिरो नरोकिएकोले अवरुद्ध सडकखण्ड खुलाउन समस्या देखिएको बताएका छन् ।

यो समाचार तयार पर्दा सम्म  पनि डोजर, लोडर र एक्साभेटर प्रयोग गरेर पहिरो हटाउने प्रयास जारी छ।थप कुनै समस्या नरहे शनिबार साँझ सम्म सडकखण्ड संचालनमा ल्याइने एसपी पुरीले बताएका छन् ।