पत्रकार महासंघ मकवानपुरको सहकारी अस्पतालसँग स्वास्थ्य जाँचको सम्झौता

११ असोज, हेटौंडा। नेपाल पत्रकार महासंघ मकवानपुर शाखाले हेटौंडा १ मा रहेको मकवानपुर सहकारी अस्पतालसँग तीन वर्षका लागि संघमा आबद्ध सबै सदस्यहरूको निःशुल्क उपचार हुने गरी स्वास्थ्य सम्झौता गरेको छ। 
महासंघ मकवानपुरले शनिबार महासंघको सभाहलमा सुनौलो भविष्य सहकारी संस्था लिमिटेडद्वारा सञ्चालित अस्पतालसँग उक्त सम्झौता गरेको हो।महासंघ मकवानपुरका अध्यक्ष बालकृष्ण अधिकारी र अस्पतालका प्रतिनिधि नरोत्तम दाहालबीच सम्झौता भएको हो ।

तीन वर्षका लागि भएको सम्झौतामा महासंघका सदस्य पत्रकारहरूको स्वास्थ्य परीक्षण तथा उपचार निःशुल्क गरिने जनाइएको छ ।सहकारी अस्पतालले सामाजिक उत्तरदायित्व वहनअन्तर्गत पत्रकार महासंघ मकवानपुरमा सदस्य र सदस्य बन्ने क्रममा रहेका सक्रिय पत्रकारहरूलाई स्वास्थ्य सेवा पहुँचमा सहजता प्रदान गर्ने उल्लेख छ । सम्झौतामा सम्पूर्ण ओपिडी सेवा निःशुल्क हुने, शल्यक्रिया तथा भर्ना भई उपचार गर्दा निःशुल्क गरिने, ल्याब सेवा निःशुल्क,  रेडियोलोजी सेवा र अन्य परीक्षणसम्बन्धी अस्पतालमा उपलब्ध सेवा निःशुल्क हुने उल्लेख छ ।

त्यस्तै औषधीमा १० प्रतिशत छुट पनि प्राप्त हुने दुवै पक्षबिच भएको सम्झौतामा उल्लेख छ । सेवा लिनका लागि नेपाल पत्रकार महासंघले जारी गरेको सदस्यता प्रमाणपत्र अनिवार्य आवश्यक रहेको जनाइएको छ। कार्यक्रममा नेपाल पत्रकार महासंघ बागमतीका अध्यक्ष कृष्ण सारू मगर, संस्थापक अध्यक्ष प्रताप विष्ट, निवर्तमान उपाध्यक्ष रुपेश दुलाल, वर्तमान उपाध्यक्ष हरि हुमागाईं लगायतका पत्रिकाहरूको उपस्थिती रहेको थियो ।