हेटौंडामा उपमहानगरपालिकाले खानेपानीमा दिँदै आएको अनुदान हटायो

२७ असोज, हेटौंडा। हेटौंडा खानेपानी व्यवस्थापन बोर्ड र  हेटौंडा उपमहानगरपालिका बिच सम्झौता भइ उपमहानगरपालिकाले खानेपानीको  न्यूनतम खपत (१० हजार लिटर) बापत दिँदै आएको अनुदान कटौती गरेको छ। 
हेटौंडा खानेपानी व्यवस्थापन बोर्डको धाराबाट वितरण गरेको खानेपानीमा न्यूनतम् निःशुल्क १० हजार लिटर पानी खपत गरेबाट हेटौंडा उपमहानगरपालिकाले अनुदान दिँदै आएको थियो । अनुदान बापत न्यूनतम १० हजार लिटर पानी खपत गरेका उपभोक्ताले कुनै शुल्क तिर्नु पार्दैनथ्यो ।
यो सेवा असोज ८ गतेबाट हेटौंडा उपमहानगरपालिकाले पत्र पठाएर कटौती गर्न भनेपछि हाललाई न्यूनतम खपतको अनुदान हटेको हेटौँडा खानेपानी व्यवस्थापन बोर्डका निमित्त कार्यकारी निर्देशक विष्णु प्रसाद सापकोटाले जानकारी दिएका छन्। उक्त निर्णयले करिब ८ हजार घरधुरी यस सेवाबाट (जुन एक तिहाइ हुन् आउछ) प्रत्यक्ष प्रभावमा  परेको सापकोटाले जानकारी दिएका छन्। उनले हेटौंडाका १९ वडामा  करिब ३० प्रतिशत् उपभोक्ताले छुटको लाभ लिइरहेका बताएका छन् । अब हेटौंडाका उपभोक्ताले १० हजार लिटर पानी खपत गरेमा ८५ रुपैयाँ र प्रति एक हजार लिटरमा २५ रुपैयाँका दरले पानीको भुक्तानी गर्नुपर्नेछ। 

नगरपालिकाले नेपाल सरकारको अर्थ मन्त्रालयको ‘मितव्ययिता निर्देशिका’ अनुसार उपभोक्ताबाट त्यसमा नियमानुसार शुल्क संकलन गर्ने व्यवस्था लागु गर्ने निर्णय अनुसारनै दिँदै आएको अनुदान कटौती गरेको हेटौंडा उपमहानगरपालिकाले जनाएको छ ।
उपमहानगरपालिका प्रमुख प्रशासकीय अधिकृत भरत गौतमले संघिय सरकारको निर्देशन अनुसारनै खर्च कटौती गरी मितव्ययी कायम गरिएको बताएका छन्।
हेटौंडा उपमहानगरपालिका र खानेपानी व्यवस्थापन बोर्ड हेटौंडाबीच खानेपानीको न्यूनतम् महसुल रकम उपभोक्तालाई निःशुल्क गर्ने द्विपक्षीय सम्झौता २०७९ साउन २३ गते भएको थियो ।