हेटौंडा-१ स्थित मैनटार खानेपानी समिति हेटौंडा खानेपानी बोर्डलाई हस्तान्तरण

१७ कार्तिक, हेटौंडा। हेटौँडा–१, स्थित मैनटार खानेपानी उपभोक्ता समिति  हेटाैंडा खानेपानी व्यवस्थापन बोर्डमा गाभिएको छ ।
आइतबार एक कार्यक्रमका बीच समिति बोर्डमा हस्तान्तरण गरिएसंगै मैनटार खानेपानी उपभोक्ता समिति हेटौंडा खानेपानी व्यवस्थापन बोर्डमा गाभिएको हो । हेटौंडा खानेपानी व्यवस्थापन बोर्डमा हस्तान्तरण भएको मैनाटार १७ औ समिति हो। समितिका अध्यक्ष दिल बहादुर सुनारको सभाध्यक्षता, हेटौँडा उपमहानरपालिकाका उपप्रमुख राजेश बानियाँको प्रमुख आतिथ्य तथा वडा अध्यक्ष सविन न्यौपानेको उपस्थितिमा समिति हस्तान्तरण कार्यक्रम भएको हो । कार्यक्रममा हेटौँडा खानेपानी व्यवस्थापन बोर्डका अध्यक्ष प्रताप बिष्ट, बोर्ड सदस्य इन्द्रप्रसाद नेपाल, वडा सदस्य रामकृष्ण अधिकारी, हेटौंडा खानेपानी व्यवस्थापन बोर्डका कार्यकारी निर्देशक बिष्णु प्रसाद सापकोटा र इन्जिनियर विपिन राज वाग्लेको पनि उपस्थिति रहेको थियो ।
वागमती प्रदेश सरकारको खानेपानी उर्जा तथा सिचाई मन्त्रालयबाट विनियोजित १ करोड १० लाख रुपैयाँ र उपभोक्ताहरुको लागत सहभागितासमेत कूल १ करोड ४० लाखमा सम्पन्न १ लाख लिटर क्षमताको पानी टंकी, समवेल, करिब ५ किलोमिटर पाइपलाइनसहितका पूर्वाधारहरु एवम् हालसम्म जडान भई पानी संचालनमा रहेको ६९ वटा धाराहरु हेटौंडा खानेपानी व्यवस्थापन बोर्डमा हस्तान्तरण भएको छ । अझै हेटौंडा १२ र १३ नम्बर वडामा भने हेटौंडा खानेपानी व्यवस्थापन बोर्डको सेवा पुग्न सकेको छैन ।