नयाँ सरकार गठन गर्ने जेनजीको चेतावनी, राष्ट्रपतिलाई ज्ञापनपत्र

४ मंसिर, हेटौंडा । जेनजीका विभिन्न समूहको टोलीले आफुहरूको माग पुरा नगरे नयाँ सरकार गठन गर्ने चेतावनी दिएको छ ।
राष्ट्रपतिलाई सम्बोधन गर्दै राष्ट्रपति कार्यालयमा ज्ञापनपत्र दर्ता गराउँदै उनीहरूले सरकारले विद्रोही पक्षका माग पूरा गर्न सक्तैन भने यो सरकारलाई फिर्ता बोलाई हाम्रो नेतृत्वमा नयाँ सरकार गठनको लागि मध्यस्थताको भूमिका निर्वाह गर्न राष्ट्रपतिलाई आग्रह गरेका छन् ।
सुशीला कार्कीको प्रधानमन्त्रीत्वमा वर्तमान सरकारले मुलुकमा भएका ठूला भ्रष्टाचारका प्रकरणमा संलग्नलाई कारवाही, प्रत्यक्ष जन निर्वाचित प्रधानमन्त्रीको लागि संविधान संशोधन, जेनजी विद्रोहमा भएको नरसंहारमा संलग्नमाथि कारवाही, जेन्जी विद्रोहका घाइतेहरुको उपचार र जेन्जी विद्रोहका शहीद परिवारलाई उचित क्षतिपूर्ति र भरणपोषण गर्नुपर्ने माग राखेका छन् ।
विद्रोहको जगमा बनेको सरकारले विद्रोहीका न्यूनतम अपेक्षा पूरा गर्नुको सट्टा सबै अपेक्षालाई बेवास्ता गर्दै केवल चुनाव मात्र गराउने गरी सरकार दिशाहीन अवस्थामा रहेको पाइएको उनीहरूको भनाई छ ।
विद्रोहमा संलग्न जेनजीका २३ एलाइन्स, घाइते र शहीद परिवार यो सरकारले तत्काल विद्रोही पक्षका माग सम्बोधन गर्नु पर्ने उनीहरूले पर्दछ। 
सरकारले विद्रोही पक्षका माग पूरा गर्न सक्तैन भने यो सरकारलाई फिर्ता बोलाई आफुहरूको नेतृत्वमा नयाँ सरकार गठनको लागि मध्यस्थताको भूमिका निर्वाह गर्न राष्ट्रपतिलाई आग्रह गरिएको छ । अन्यथा सरकारको विरुद्धमा अर्को शान्तिपूर्ण आन्दोलन तथा दवाव कार्यक्रम हुने समेत चेतावनी दिइएको छ ।
ज्ञापनपत्र दर्ता गराउनेमा जेन्जी नेशनल फ्रन्ट लाइनर, जेन्जी स्पार्क, एनटेक जेन्जी, ऋणी एसोसियसन नेपाल, जेन्जी वाई यूनाइटेड, जेन्जी सभा, जेन्जी पार्लियामेन्ट, जिबिबि ग्रुप, जियूपिसि ग्रुप, जेवाइएन ग्रुप, जेन्जी यूनाइटेड, जेन्जी २.०, रियल जेजी, जेन्जी वाई ग्रुप, जेन्जी एलायन्स, नेपाल जेन्जी रिभ्यूलेसन (एनजिआर), इक्वीटि नेपाल, समता जेन्जी, अल नेशन जेन्जी, स्वतन्त्र जेन्जी नेपाल, डिजिटल टास्क फोर्स जेन्जी ग्रुप, जेन्जी एकता मञ्च र जेन्जी मुभमेन्ट नेपाल छन् ।