नेपाल उद्योग वाणिज्य महासंघद्धारा  मु्ख्यमन्त्रीको ध्यानाकर्षण

१५ चैत, हेटौँडा । नेपाल उद्योग वाणिज्य महासंघले प्रदेश नम्बर ३ मा लगानीको वातावरण बनाउन मुख्यमन्त्रीको ध्यानाकर्षण गराएको छ । ‘अभियानको समृद्धिको, साझेदारी निजी क्षेत्रको’ भन्ने नारासहित प्रदेश ३ को अस्थायी राजधानी हेटौंडामा बिहीबार भएको प्रादेशिक आर्थिक बहसमा निजी क्षेत्रले लगानीको वातावरण बनाउन मु्ख्यमन्त्रीको ध्यानाकर्षण गराएको हो ।

उद्योग वाणिज्य महासंघकी अध्यक्ष भवानी राणाले ३ नम्बर प्रदेशमा आर्थिक समद्धिको अत्यन्त सम्भावना रहेको भन्दै मुख्यमन्त्री डोरमणि पौडेललाई लगानीको वातावरण बनाउन आग्रह गर्नुभयो । नेपालका दुवै छिमेकी मुुलुक भारत र चीनसँग सीमा जोडिएका जिल्ला यही प्रदेशमा भएकाले आयात, निर्यातको सम्भावना अन्यत्रभन्दा यस प्रदेशमा बढी रहेको उहाँको भनाइ थियो । उद्योग वाणिज्य महासंघले भारत र चीनका लगानीकर्ता उद्योगीहरूसँग नेपालमा लगानी वृद्धि गर्न आग्रह गरिरहेको र नेपालमा कसरी उद्योग स्थापना गर्न सकिन्छ भनेर छलफल चलाइरहेको जानकारी दिनुभयो । महासंघकी अध्यक्ष राणाले नेपालको निजी क्षेत्रले कृषिमा गरेको कूल लगानीमध्ये ३१ प्रतिशत, सेवा क्षेत्रको ४४.८ प्रतिशत, बैंकिङ क्षेत्रको ७५ प्रतिशत यही प्रदेशमा रहेको भन्दै करलाई व्यवसायीमैत्री बनाउने आग्रह गर्नुभयो । उद्योग कलकारखाना स्थापना गर्न राम्रो सम्भावना भए पनि भूमिका व्यवस्थापनको समस्या भने व्यवसायीले बारम्बार खेप्नु परेको भन्दै अध्यक्ष राणाले विशेष आर्थिक क्षेत्रको माग गर्नुभयो