सहकारीले ठूला उद्योगमा लगानी गर्नुपर्छ : पौडेल

२० चैत, हेटौँडा । प्रदेश नम्बर ३ का मूख्यमन्त्री डोरमणी पौडेलले सहकारीले ठुला उद्योगमा लगानी गर्नुपर्ने बताएका छन् ।

सहकारीले अव ठूला उद्योगमा लगानी गरेर रोजगार दिनेतर्फ अग्रसर हुनुपर्ने पौडेलको भनाई छ । ६१ औँ राष्ट्रिय सहकारी दिवसको अवसरमा मंगलबार हेटौँडामा राष्ट्रिय सहकारी दिवस मूल समारोह समितिले आयोजना गरेको कार्यक्रममा बोल्दै मूख्यमन्त्री पौडेलले सरकारीले रोजगारमुलक उद्योग संचालन गर्न चाहे प्रदेश सरकारले लगानीमा सहयोग गर्ने प्रतिवद्धता व्यक्त गरे । 

प्रदेश नम्बर ३ का आर्थिक मामिला तथा योजना मन्त्री कैलाश ढुंगेलले सहकारी आर्थिक क्षेत्रको एक खम्बाको रुपमा रहेको भन्दै सहकारीलाई उत्पादनमुलक क्षेत्रमा काम गर्नुपर्नेमा जोड दिए । दिवसको अवसरमा मूल समारोह समितिले जिल्लाको उत्कृष्ट सहकारीको रुपमा मनकामना दुग्ध उत्पादक सहकारी संस्था, सहकारी अभियानकर्ताहरु विमल ढकाल र कल्पना श्रेष्ठ, ब्यवस्थापकहरु बसन्त घलान तथा कोपिला थापालाई सम्मान गरिएको छ ।

त्यस्तै, सहकारी बैंकको तर्फबाट नियमित कारोबारमा दिब्यतारा बहुउद्देश्यीय सहकारी संस्था र उत्कृष्ट कारोबारमा हेटौँडा बचत तथा ऋण सहकारी सस्थालाई सम्मान गरिएको छ ।