एनटिएनसीबाट सालक संरक्षणका लागि सहयोग

१३ असोज, हेटौँडा । चितवनको सौराहामा रहेको राष्ट्रिय प्रकृति संरक्षण कोष (एनटिएनसी) ले सालक संरक्षणको लागि मकवानपुरसहित विभिन्न जिल्लाका सामुदायिक वन समूहहरुलाई आर्थिक सहयोग प्रदान गर्ने भएको छ ।
कोषले मकवानपुरमा रहेको रानी, न्यूरेनी चिसापानी, अशोक, चुच्चेखोला, सुन्दर, चेतना, र गुप्तेश्वरी सामुदायिक वन र चितवनमा रहेको कंकाली, अजिंगरे, अमृतधारा, कालिका र बाघदेवी सामुदायिक वन उपभोक्ता समूहलाई आर्थिक सहयोग गरेको हो । यसैगरी गोरखाको देउराली, मालुङ्गे, दुम्सीभिर र पालुङगैरा सामुदायिक वन उपभोक्ता समूहलाई पनि आर्थिक सहयोग गरेको छ । कोषले प्रति समूह २५ हजारका दरले सहयोग गरेको हो । यसअघि पनि कोषले ती  समूहलाई आर्थिक सहयोग गरेको थियो ।
‘विश्वमा दुर्लभ एवम लोपोन्मुख सालकको संरक्षण,आहार,बासस्थान र यसको संख्यामा वृद्धि गर्नको लागि एनटिएनसीले आर्थिक सहयोग गरेका हो’– कोषका निमित्त कार्यालय प्रमुख रामकुमार अर्यालले जानकारी गराए । कोषले क्यामरा ट्रयापिङ, सचेतनामुलक तालिम, गोष्ठी, होडिङ बोर्ड निर्माण लगायतका कामहरु समेत गर्दै आएको कोषका प्राकृतिक संरक्षण सहायक ऋषिराम सुवेदीले बताए ।
सालकको संख्या विश्वमा दिन प्रतिदिन घट्दै गैरहेको अवस्थामा कोषले प्रदान गरेको रकमले सालक संरक्षणका लािग थोरै भए पनि सहयोग मिलेको रानी सामुदायिक वनका अध्यक्ष कृष्ण बिडारीले बताए । मकवानपुर जिल्लामा रानी सामुदायिक वनले सालकको संरक्षणको लागि ब्लक नं २ र ३ लाई सालक संरक्षणको रुपमा विकास गरेको अध्यक्ष विडारीले बताए । रानी सामुदायिक वनको क्षेत्रमा १ दर्जन बढि सालक रहेको अनुमान गरिएको छ ।