किरणले हेटौँडामा खोले सुविधा सम्पन्न सैलुन

१५ कार्तिक, हेटौँडा । युवा व्यवसायी किरण अधिकारीले हेटौँडामा सुविधा सम्पन्न सैलुन संचालन गरेका छन् । विगत १८ बर्षदेखि यो पेशामा आवद्ध उनले हेटौँडा–४ स्कूलरोड स्थित ग्रिन हाउस भवनमा सुविधा सम्पन्न नेपोलियन हेयर एण्ड व्युटि सैलुन संचालन गरेका हुन् । 
८ बर्ष अघि स्वरोजगारका लागि कपाल काट्ने सैलुन संचालन गरेका उनले ५ जनालाई रोजगारी दिने योजनासहित व्यवसायिक ढंगले काम थालेका छन् । सैलुनको युवा राष्ट्रिय परिषदका उपाध्यक्ष माधवप्रसाद ढुंगेलले उद्घाटन गरेका थिए । कार्यक्रममा बोल्दै ढुंगले युवाहरु नै समृद्धिको संवाहक भएको बताउँदै युवाहरुलाई प्रवद्र्धन गर्न परिषद तयार रहेको बताए । उनले विदेशमा जस्तो सुकै काम गर्न तयार हुने युवाहरुले स्वादेशमा भने काम गर्न हिच्किचाउने गरेको गुनासो गरे । 
कार्यक्रममा बोल्दै मकवानपुर उद्योग बाणिज्य संघका बरिष्ठ उपाध्यक्ष माधव न्यौपाने, नेपाल पत्रकार महासंघ ३ नम्बर प्रदेश अध्यक्ष प्रताप विष्ट, जिल्ला युवा समितिका अध्यक्ष सन्तोष चौलागाई, सुशिल घिमिरे लगायतले सैलुन व्यवसायमा राम्रो आम्दानी भएपनि युवाहरुको आकर्षण नहुँदा लाखौं रुपैँया भारत जाने गरेको बताए । युवाहरु बेरोजगार भएको तथ्यांक भएपनि सिपयुक्त युवाहरुको अभाव रहेको भन्दै सिपयुक्त हुन सके रोजगारीको अवसरका लागि कुनै समस्या नरहेको बताए । 
कार्यक्रममा सैलुनका संचालक अधिकारीले युवाहरुलाई तालिम प्रदान गर्ने र गुणस्तरीय सेवा प्रदान गर्नका लागि व्यवसायिक ढंगले संचालन गर्न लागेको सैलुनमा १५ लाख रुपैँया लगानी भएको जानकारी दिए । उनले सैलुन व्यवसाय गर्न सके स्वदेशमै युवाहरु आर्थिक रुपमा सवल हुन सक्ने दावि समेत गरे ।