सवारी दुर्घटनामा ५ जनाको मृत्यु, ३३ घाइते

२४ कार्तिक, हेटौँडा । देशका विभिन्न स्थानमा शनिबार भएको सवारी दुर्घटनामा ५ जनाको मृत्यु भएको छ । ति दुर्घटनामा ३३ जना घाइते भएका छन् । 

पूर्वपश्चिम राजमार्ग अन्तरगत बाराको निजगढ नगरपालिका वडा नम्बर ९ भमरा पुल नजिक जिप र ट्याक्सी ठोक्किदा ३ जनाको मृत्यु भएको छ । ग २ च २३२५ नम्बरको जीप र बा २ ज २११७ नम्बरको ट्याक्सी ठोकिदा ट्याक्सी चालक भक्तपुरका समुन्द्र श्रेष्ठ तथा ट्याक्सीमा सवार निजगढ ७ का आकाश माझी र विशाल माझीको मृत्यु भएको छ । दुर्घटनामा गम्भिर घाइते ट्याक्सीमा सवार नरेश माझी र अजुर्ण माझीको चितवनको भरतपुरस्थित पुरानो मेडिकलमा उपचार भईरहेको इलाका प्रहरी कार्यालय निजगढका प्रहरी निरिक्षक विक्रम लामाले जानकारी दिए ।

यस्तै, पृथ्वीराजमार्ग अन्तर्गत धार्दिङको बेनिघाटमा बस आपसमा ठोकिदा एक जनाको मृत्यु भएको छ । मृत्यु हुनेमा ना ७ ख ५२८१ नम्वरका बस चालक चितवन पिप्लेका ४० बर्षिय ईश्वर भण्डारी छन् । ३१ जना घाइते भएको गजुरीका ट्राफिक प्रहरी निरीक्षक हेमराज घिमिरेले जानकारी दिए । 

यता, चितवन राप्ती नगरपालिका वडा नम्बर ६ मा नम्बर नखुलेको सवारीले ठक्कर दिदा ना ४० प ७०२४ नम्बरको मोटरसाइकलका चालक राप्ती –१ का २९ बर्षीय रमेशबाबु त्रिपाठीको मृत्यु भएको चितवन प्रहरीले जनाएको छ ।