हेटौँडामा प्रादेशिक वन ऐन मस्यौदाबारे छलफल

३० कार्तिक, हेटौँडा । वन तथा भू संरक्षण विभाग काठमाडौंले शुक्रबार प्रदेश नम्बर ३ को राजधानी हेटौँडामा एक दिवसीय वन तथा वातावरण सम्बन्धी प्रादेशिक वन ऐनको मस्यौदा विधेयकमाथि छलफल गरेको छ ।
बैठकमा उपसचिव राकेश कर्णले मस्यौदा विधेयक प्रस्तुत गरेका थिए । ८८ दफा समावेश गरिएको मस्यौदामाथि वन क्षेत्रका विशेषज्ञ एवं सरोकारवालाहरुले सुझाव प्रस्तुत गरेका थिए । कार्यक्रममा प्रदेश नम्बर ३ का पर्यटन, उद्योग, वन तथा वातावरण मन्त्री अरुण नेपालले प्रस्तुत भएको मस्यौदाले समग्र वन क्षेत्रको विकासमा महत्वपूर्ण टेवा पुग्ने बताए ।
कार्यक्रममा वन तथा भू संरक्षण मन्त्रालयका महानिर्देशक डा. रामप्रकाश लम्साल, प्रदेश नम्बर ३ का वन तथा वातावरण सचिव शिवकुमार वाग्ले, क्षेत्रीय वन निर्देशनालय हेटौँडाका वन निर्देशक सुधिर कोइराला, मनहरी गाउँपालिकाका अध्यक्ष एकराज उप्रेति, हेटौँडा उपमहानगरपालिकाका उपमेयर मिना लामा, डिभिजन वन कार्यालय काभ्रेका वन अधिकृत बद्रीबहादुर कार्की लगायतको सहभागिता रहेको थियो ।
कार्यक्रममा प्रदेश नम्बर ३ अन्तरगतका सामुदायिक वन उपभोक्ता महासंघका पदाधिकारी, सामुदायिक वन समूहका पदाधिकारी, जनप्रतिनिधि, संचारकर्मी र वन क्षेत्रका कर्मचारीको सहभागिता रहेको थियो ।