कांग्रेसको प्रस्तावित विधान : दुई कार्यकाल मात्रै सभापति

File Photo

९ मंसिर, काठमाडौं । नेपाली कांग्रेसको नयाँ प्रस्तावित विधानको मस्यौदा पार्टी केन्द्रीय कार्यसमिति बैठकमा प्रस्तुत भएको छ । आइतबार केन्द्रीय कार्यालय सानेपामा बसेको बैठकमा प्रस्तावित विधाई फरक मतसहित प्रस्तुत भएको हो ।

प्रस्तावित विधानमा पार्टीको सबै तहको कार्यसमिति सभापति पदमा निरन्तर दुई कार्यकाल भन्दा बढी उम्मेदवार बन्ने नपाउने प्रावधान रहेको छ । कांग्रेसको प्रस्तावित विधानको  ५६ दफामा यसबारे उल्लेख गरिएको छ । मस्यौदामा एक व्यक्ति, एक पदको अवधारणा पनि प्रस्ताव गरिएको छ । प्रस्तावित विधानमा पार्टीको तल्लो निकायको सभापति, उपसभापति, सचिव, कोषाध्यक्ष र सहसचिव माथिल्लो तहको कार्यसमितिमा उम्मेदवार बने उसको  तल्लो पद स्वतः रिक्त हुने व्यवस्था गरिएको छ  ।

प्रस्तावित विधानमा ज्येष्ठ राजनीतिज्ञ सभाको व्यवस्था गरिएको छ, जसमा कांग्रेसमा रही लामो समयदेखि निरन्तर योगदान पुर्याउँदै आएका सम्मानित व्यक्तिहरू तर वर्तमान अवस्थामा पार्टीको कुनै पनि तहको संरचनामा सक्रिय नरहेका ६५ वर्ष उमेर पुगेका पार्टीका ज्येष्ठ राजनीतिकर्मीहरूको सहभागितामा केन्द्रीय सभापतिको अध्यक्षतामा केन्द्रमा ज्येष्ठ राजनीतिज्ञ सभा रहनेछ ।