सबै खाले हिंसाको प्रतिकार जरुरी : सभामुख श्रेष्ठ

९ मंसिर, हेटौँडा । प्रदेश नम्बर ३ का सभामुख सानुकुमार श्रेष्ठले समाजमा हुने सबैखाले हिंसाको प्रतिकार गर्न आग्रह गरेका छन् । प्रदेश नम्बर ३ को प्रदेश सभा सचिवालयको आयोजना र युएन उमनका सहकार्यमा लैंंगिक हिंसाविरुद्धको १६ दिने अभियानका क्रममा आइतबार हेटौँडामा भएको अन्तरक्रियामा बोल्दै उनले यस्तो बताएका हुन् ।

सभामुख श्रेष्ठले चेतनाको हिसाबले प्रदेश नम्बर ३ अगाडि रहेको भएपनि कहिलकाँही हिंसाका खबर बाहिर आईरहेकाले सबै खाले हिंसा अन्त्यका लागि सबै एकजुट हुनुपर्ने बताए । उनले महिलामाथि हुने सबै प्रकारको  हिंसा अन्त्यका लागि आफू प्रतिवद्ध रहेको बताए । त्यसैगरी कार्यक्रममा प्रदेश नम्बर ३ का आन्तरिक मामिला तथा कानुन मन्त्री शालिकराम जम्कट्टेलले हिंसा घटदो क्रममा भएपनि नियन्त्रणमा भने सरकार असफल रहेको स्विकार्दै आवश्यक पहलका लागि प्रतिवद्ध रहेको बताए । उनले निर्मला पन्तको घटनामा संलग्नलाई  कारबाही हुन नसक्दा हिंसा नरोकिने बताउँदै दोषिलाई कारवाही गर्न नसक्दा आफु समेत लज्जित भएको बताए ।
कार्यक्रममा प्रदेश मामिला समिति सभापति रामेश्वर फुयाँलले हिंसा न्यूनिकरणका लागि सबैको पहलको खाँचो रहेको बताउँदै लिंग पहिचान गरी भ्रुण हत्या गर्नेलाई कडा कारवाही हुनुपर्नेमा जोड दिए । प्रदेशकी उपसभामुख राधिका तामाङको सभाध्यक्षतामा भएको कार्यक्रममा प्रदेश सभा सदस्यहरु घनश्याम दाहाल, विजया श्रेष्ठ केसीलगायतले मन्तव्य व्यक्त गरेका थिए ।