हेटौँडा अस्पतालमा अक्सिजन पाईपलाईन र सक्सन मेसिन संचालन

१० मंसिर, हेटौँडा । हेटौँडाको एकमात्रै सरकारी अस्पताल हेटौँडा अस्पतालमा अक्सिजन पाईपलाईन र सक्सन मेसिन संचालनमा आएको छ ।
२०६७ सालमा लगाएको महायज्ञबाट जडान भएको पाईपलाईन र सक्सन मेसिन ८ बर्षपछि आइतबारबाट संचालनमा आएको हो । अस्पताल व्यवस्थापनले सोमबार पत्रकार सम्मेलन गरी यसबारे जानकारी गराएको छ । १२ लाख रूपैयाँमा जठान भएको अक्सिजन पाईपलाईन संचालनमा आएपछि अबदेखि विरामीसंगै अक्सिजनको सिलिण्डर राख्नुपर्ने झन्झट हरेको छ । त्यस्तै, गम्भिर विरामीको खकार, थुक, अप्रेसनका क्रममा आउने रगत, पिप, पानी लगायत सोस्नका लागि सक्सन मेसिनले सुविधा पुग्ने अस्पतालका मेडिकल सुपरिटेण्डेन्ट प्रविन श्रेष्ठले जानकारी दिए । अस्पतालमा विभिन्न खाले अप्रेशन संचालन भईरहेको र थाईराईज जाँच समेत संचालन भईरहेको श्रेष्ठको भनाई छ । महायज्ञमा नेपाल इकरात इन्जिनियरिङले घोषणा गरेको सहयोग रकम बराबर छुट गरी अस्पताल परिसरमा छुट्टै ट्रान्स्फर्मर जडान भएको जनाईएको छ ।
अस्पतालमा पछिल्लो समय अस्पतालको सेवामा उल्लेख्य सुधार आएको हेटौँडा वडा नम्बर १ का वडा अध्यक्ष सविन न्यौपानेले बताए । अस्पताल व्यवस्थापनले वडा कार्यालय र उपमहानगरपालिकासंग समन्वय गर्दै अघि बढेको बताउँदै अध्यक्ष न्यौपानेले यसले गर्दा मकवानपुरका विरामीले सहज सुविधा पाईरहेको दावि गरे । अस्पतालमा अहिले बहिरंग (ओपिडि) सेवामा दैनिक तीन सय र आकस्मिक सेवातर्फ १ सय ५० देखि २ सय विरामी आउने गरेको अस्पताल व्यवस्थापनले जनाएको छ । 
पत्रकार सम्मेलनमा अस्पतालका डा. हरि खड्कासहित चिकित्सक तथा स्वास्थ्यकर्मीहरुको सहभागिता रहेको थियो ।