किसान दुग्ध सहकारीको २८ औँ साधारणसभा 

१५ मंसिर, हेटौँडा । हेटौंडा–१७ मा रहेको किसान दुग्ध उत्पादक सहकारी संस्थाको २८ औँ वार्षिक साधारणसभा शनिबार भएको छ । 
केन्द्रीय दुग्ध उत्पादक सहकारी संघका अध्यक्ष नारायणप्रसाद देवकोटाको प्रमुख आतिथ्यता तथा संस्थाका अध्यक्ष उद्धव सत्यालको अध्यक्षतामा साधारणसभा भएको हो । कार्यक्रमका प्रमुख अतिथि देवकोटाले किसानले उत्पादनलाई बृद्धि गर्दै लागत घटाउन लाग्नुपर्ने बताए । किसानले आफ्नो लागि आवश्यक पर्ने घाँस आफैले उत्पादन गर्नुपर्नेमा उनले जोड दिएका थिए । ३११ जना शेयर सदस्य रहेको सहकारीले ४०९ वटा गाई र भैसीको बीमा गराएको छ । सहकारीले बीमा गरेका २ वटा पशु मरेकोले ५६ हजार रकम किसानलाई फिर्ता समेत गरेको छ । 
सहकारीले एक वर्षमा ४ लाख १ हजार ७ सय ४९ लिटर दूध विक्री गर्न सफल भएको संस्थाका अध्यक्ष उद्धव सत्यालले जानकारी दिए । सहकारीको शेयर पूँजी १५ लाख ५८ हजार ६ सय रुपैयाँ र बचत निक्षेप ४६ लाख ७४ हजार २ सय २० रुपैयाँ रहेको अध्यक्षद्वारा प्रस्तुत प्रतिवेदनमा उल्लेख छ । साधारण सभाको अवसरमा सहकारीले विभिन्न विधामा शेयर सदस्यहरुलाई सम्मान समेत गरेको छ । बढी परिमाणमा दुग्ध विक्री गर्ने कल्पना रेग्मी र गोविन्द प्रसाद अधिकारीलाई सम्मान गरेको छ । 
रेग्मीले ८ हजार ६ सय २० लिटर दूध विक्री गर्दै प्रथम र अधिकारी ६ हजार ८ सय ९९ लिटर दूध विक्री गर्दै दोश्रो भएका हुन् । त्यस्तै, दुग्ध पदार्थको गुणस्तर तर्फ बाबुराम मोक्तान, शेरबहादुर राई र उत्कृष्ठ ऋणीमा कृष्णप्रसादद रुपाखेतीलाई सम्मान गरेको हो । सहकारीले एसईई परिक्षामा उत्कृष्ठ अंक ल्याउने शेयर सदस्यका छोराछोरीलाई सम्मान समेत गरेको छ ।