गोरखनाथ सहकारीको १७ औं वार्षिक साधारणसभा

२८ मंसिर, हेटौँडा । मकवानपुरगढी–४ मा रहेको गोरखनाथ दुग्ध उत्पादक सहकारी संस्थाको १७ औं वार्षिक साधारणसभा शुक्रवार सम्पन्न भएको छ । साधारणसभामा संस्थाका अध्यक्ष टिकाप्रसाद ढकालले चालु आव ०७५/०७६ को प्रस्तावित कार्यक्रम, व्यवस्थापक अर्जुनप्रसाद तिमल्सिनाले आव ०७४/०७५ को प्रगति प्रतिवेदन र लेखा संयोजक ताराप्रसाद देवकोटाले आर्थिक प्रतिवेदन प्रस्तुत गरेका थिए ।
भेलामा बढी दिन दूध विक्री गर्ने सीता तिमल्सिना, गणेश कठायत, नियमित दूध विक्री गर्ने विमला योन्जन, दुर्गाप्रसाद हुमागाई र चन्द्रप्रसाद घिमिरे, गुणस्तरीय दूध विक्री गर्ने सीता सापकोटा, कृष्णप्रसाद घिमिरे र हरीप्रसाद सापकोटालाई पुरस्कृत गरिएको थियो । यसैगरी सफा दूध विक्री गर्ने सरीता ढकाल, सुकुमाया मोक्तान, राजन तिमल्सिना, संस्थापक अध्यक्ष जगनाथ तिमल्सिना, पूर्वअध्यक्ष गोपीकृष्ण सापकोटा संस्थापक संचालक सदस्य ध्रुवप्रसाद देवकोटा लगायतकालाई सम्मान गरिएको थियो ।
मकवानपुर जिल्ला दुग्ध उत्पादक सहकारी संघका अध्यक्ष बासुदेव अधिकारीको प्रमुख आतिथ्यता एवम संस्थाका अध्यक्ष टिकाप्रसाद ढकालको सभाध्यक्षतामा सम्पन्न भएको भेलामा मकवानपुरगढी ४ का वडा अध्यक्ष रामप्रसाद तिमल्सिना,युवा तथा साना व्यवसायी संघकी संयोजक मीना अर्याल, संचारकर्मी भीमसेन पौडेल, संस्थाकी उपाध्यक्ष सावित्रीदेवी तिमल्सिना लगायतले मन्तव्य व्यक्त गरेका थिए । 
संस्थाले आव ०७४/०७५ मा किसानहरुलाई ५१ लाख ५४ हजार २ सय १६ रुपैयाँ भुक्तानी गरेको जनाएको छ । संस्थामा २ सय ५५ जना शेयर सदस्यहरु आवद्ध रहेका छन ।