मेलम्चीको काम सरकार आफैले सक्ने 

६ पुष, हेटौँडा । खानेपानीमन्त्री विना मगरले मेलम्ची खानेपानी आयोजनाको ठेक्का लिएको कम्पनी सिएमसीले काम छोडेर भागेपनि सरकार आफैले बाँकी काम सरकार आफैले गर्न सक्ने बताएकी छिन ।
प्रतिनिधिसभा अन्र्तगतको अर्थ समितिको बैठकमा विहिबार खानेपानी मन्त्री मगरले सिएमसीको ठेकेदार काम छाडेर भागेपनि नेपाल सरकारलाई घाटा नलाग्ने दाबी समेत गरिन । 
निर्माण सम्पन्न नगरेको अवस्थामा निर्माण कम्पनी विरुद्ध सिंगापुरको उच्चअदालतमा लड्न सक्ने अधिकार सरकारसंग सुरक्षित रहेको पनि मन्त्री मगरले उल्लेख गरिन ।
सरकारले भुक्तानी दिने सम्बन्धमा भने निर्माण सम्पन्न तथा रोकिएको काम सुचारु गर्ने सम्बन्धमा केही शर्त राखेको उनले बताइन । ठेकेदार कम्पनीले १ अर्ब ६५ करोडको दाबी गरेपनि सरकारले अब ३४ करोड मात्रै भुक्तानी गर्न बाँकी रहेको भन्दै उनले काम छोडेर भागेपनि नेपाललाई घाटा नपर्ने दाबी गरिन ।
मन्त्री मगरले आयोजनाको बाँकी कामहरु ठेकेदार कम्पनी स्वयमले नभई सहयोगी कम्पनी मार्फत भईरहेको र ती कम्पनी सरकारसंगको सिधा सम्पर्कमा रहेकाले बाकी काम तीनै सहयोगी कम्पनी मार्फत गर्न सकिने दाबी गरिन । 
काठमाण्डौबासीले मेलम्चीको पानी पर्खिरहेका बेला निर्माणको ठेक्का लिएको कम्पनी नै काम छोडेर भागेको खबर आएपछि समितिले त्यसबारे चासो राख्दै सम्बन्धीत मन्त्रीलाई छलफलमा बोलाएको हो ।