‘प्रोवेसन’ पाउने ४ सहकारीलाई हेटौँडामा सम्मान

११ पुस, हेटौँडा । पूर्ण तथा व्यवसायी साकोस विकास कार्यक्रम (प्रोवेशन) प्राप्त गर्न सफल मकवानपुरका ४ सहकारीलाई हेटौँडामा सम्मान गरेको छ । जिल्ला बचत तथा ऋण सहकारी संघ लिमिटेडले ति सहकारी संस्थालाई सम्मान गरेको हो ।

देशभरका २१ सहकारी मध्ये मकवानपुरका ४ सहकारीले प्रोबेसन प्राप्त गरेका थिए । प्रोबेशन प्राप्त गर्ने सबै महिला सहकारी रहेका छन् । हेटौँडा–१३ पदमपोखरीमारहेको महिला मिलन बचत तथा ऋण सहकारी संस्था, हेटौँडा–१५ चुरियामाईमा रहेको महिला जनचेतना बचत तथा ऋण सहकारी संस्था, मकवानपुरगढी–३ मक्रान्चुलीमा रहेको महिला जागरण बचत तथा ऋण सहकारी संस्था र भीमफेदी–४ निबुवाटारमा रहेको महिला अभियान बचत तथा ऋण सहकारी संस्थालाई सम्मान गरिएको थियो ।

नेपाल बचत तथा ऋण केन्द्रीय सहकारी संघ (नेफस्कुन)को साधारण सभाको अवसरमा मकवानपुरका ४ सहकारीलाई सम्मान गरिएको बुधबार भएको पत्रकार सम्मेलनमा जानकारी दिएको थियो । पत्रकार सम्मेलन एवं सम्मान कार्यक्रममा जिल्ला सहकारी संघका अध्यक्ष बद्री लम्साल, जिल्ला बचत तथा ऋण सहकारी संघ मकवानपुरकी अध्यक्ष राधा सिन्तान, सचिव कल्पना श्रेष्ठ, प्रोबेसन प्राप्त ४ सहकारीका पदाधिकारी लगायतको सहभागिता रहेको थियो ।