मूख्यमन्त्री पौडेलले लिए ढकालको मृत्युबारे जानकारी

२६ पुस, हेटौँडा । संचारकर्मी एवं शिक्षक मनोहर ढकालको बुधबार साँझ भएको रहस्यमय मृत्युको घटनाबारे प्रदेश नम्बर ३ का मूख्यमन्त्री डोरमणी पौडेलले जानकारी लिएका छन् । ढकालको शव राखेको हेटौँडा अस्पताल पुगेर उनले घटनाबारे जानकारी लिएका हुन् । 
विहिबार दिउँसो पुगेका  उनले  शव गृहमा शव निरिक्षण गर्दै घटनाबारे प्रहरीसंग जानकारी लिएका छन् । मूख्यमन्त्रीसंगै पुगेका मकवानपुरका प्रहरी नायव उपरीक्षक यज्ञप्रसाद भट्टराईले घटनाको सुक्ष्म ढंगबाट अनुसन्धान भईरहेको जानकारी दिएका थिए । घटनास्थल र शवको अवस्था लगायतको बारेमा नेपाल पत्रकार महासंघ प्रदेश नम्बर ३ का अध्यक्ष प्रताप विष्टले मूख्यमन्त्री पौडेललाई जानकारी दिएका थिए । शव गृहमा नेपाल पत्रकार महासंघ मकवानपुरका अध्यक्ष हरि हुमागाईसहित संचारकर्मीहरुको उपस्थिति रहेको थियो । उनीहरुले घटनालाई सुक्ष्म ढंगले अनुसन्धान गर्नुपर्नेमा जोड दिएका थिए । 
पौडेलको दुर्घटना नभई हत्या भएको हुन सक्ने आशंकामा प्रहरीले समेत अनुसन्धान अघि बढाएको छ । अनुसन्धानका लागि तालिम प्राप्त कुकुरको परिचालन समेत गरिएको थियो । ढकालको बुधबार साँझ हेटौँडा–१ भैरवडाँडास्थित पाथिभारा मन्दिर जाने सडक भित्रको जंगलमा शंकास्पद ढंगले मृत्यु भएको थियो । मोटरसाइकल दुर्घटना भनिएपछि घटनास्थल पुग्ने सर्वसाधारणले हत्याको आशंका गरेका छन् । 
उनको विहिबार अपरान्ह पोष्टमार्टमपछि राप्ति तटमा अन्त्येष्टि गरिएको छ । पदमपोखरीको पाँचतलेस्थित बुद्ध माविमा अध्यापन गर्ने उनी रेडियो अनमोलमा आवद्ध थिए । उनका श्रीमति, एक छोरा र एक छोरी छन् ।