डा. केसी शिक्षण अस्प्तालको आइसीयुमा भर्ना

४ माघ, हेटौँडा । इलाममा पुगेर १६ औं पटक अनसनमा बसेका डाक्टर गोविन्द केसीलाई शुक्रबार विहान काठमाडौँ ल्याई शिक्षण अस्पताल महाराजगञ्जमा भर्ना गरिएको छ ।
स्वास्थ्य अवस्था गम्भीर भएपछि अनसनको दशौं दिन शुक्रबार बिहान ३ बजेतिर उनलाई हेलिकप्टरबाट काठमाण्डौ ल्याएर शिक्षण अस्पतालको आईसीयूमा भर्ना गरिएको हो ।
स्वास्थ्य तथा शिक्षा समितिले पास गरी संसदमा पेस गरेको चिकित्सा शिक्षा विधेयकमा संशोधन लगायत माग राख्दै इलाममा अनसन बसेका थिए ।
सुरूमा डा केसी आइसीयुमा भर्ना हुन राजी नभए पनि गम्भीर स्वास्थ्य अवस्था हेरेर केदारभक्त माथेमा, सुिशला कार्की, दमननाथ ढुंगाना लगायतले आग्रह गरेपछि उनी आइसीयुमा बस्न राजी भएका थिए ।
१० दिनदेखि अनसनरत डा केसीको स्वास्थ्यमा गम्भीर समस्या देखिएपछि सेनाको हेलिकप्टरबाट काठमाडौं ल्याइएको केसी समूहका सदस्य डा अभिषेक सिंहले जानकारी दिए ।
१० दिनदेखि अनसनमा रहेका डाक्टर केसीको अवस्था बुझ्न र समर्थन गर्न बिहीबार पूर्व प्रधानन्यायाधीश सुशिला कार्की, पूर्व सभामुख दमननाथ ढुंगाना, त्रिभुवन विश्वविद्यालयका पूर्व उपकुलपति प्राध्यापक केदारभक्त माथेमालगायत इलाम पुगेका थिए । 
उनीहरुकै अनुरोधमा डाक्टर केसीलाई काठमाण्डौ आउन मनाइएको र नेपाली सेनाको हेलिकप्टर मगाएर काठमाण्डौ ल्याइएको डाक्टर सिंहले जानकारी दिए ।
केसीलाई इलामबाट भद्रपुरसम्म एम्बुलेन्स र त्यहाँबाट सेनाको हेलिकप्टरबाट काठमाडौं ल्याइएको हो । 
धरानको बिपी कोइराला स्वास्थ्य विज्ञान प्रतिष्ठानका विशेषज्ञ डाक्टरको टोलीले बुधबार केसीको स्वास्थ्यमा गम्भीर समस्या भएकाले इलाममा राखिराख्नु खतरापूर्ण हुने सुझाव दिएका थिए ।
तस्विरः गुगल