‘विकासे काममा भएको हस्ताक्षर लोकमानमा प्रयोग गरियो’

२१ कार्तिक, हेटौँडा । नेकपा माओवादी केन्द्रका सांसद रामनारायण विडारीले आफुहरुको हस्ताक्षर विना जानकारी लोकमान प्रकरणमा प्रयोग गरिएको बताएका छन् । उनले विकासे कामका लागि संसदिय दलमा भएको हस्ताक्षर लोकमानको महाअभियोगमा प्रयोग भएको बताएका हुन् । हेटौँडामा सञ्चारकर्मीहरुसँग कुरा गर्दै महाअभियोग सिफारिस समितिका सदस्य समेत रहेका सांसद विडारीले एमालेको हस्ताक्षर समेत त्यस्तै ढंगबाट आएको दावि गरे ।

‘अन्य प्रयोजनमा गरिएको हस्ताक्षर थाहै नदिई लोकमानको महाअभियोगमा प्रयोग गरिएछ ।’–उनले भने–‘तर पछि थाहा पाएपछि हामीले यसबारे विरोध गरेनौं ।’ कुन प्रयोजनका लागि हस्ताक्षर गरिएको थियो भन्ने पत्रकारको जिज्ञासामा विडारीले भने–‘विजुलीको तार, खम्बा, ट्रान्स्फर्मरका लागि हस्ताक्षर गर्न भनियो, हामीले जिल्लामा माग भएकाले हस्ताक्षर गरिदियौं तर पछि त्यो सही लोकमान प्रकरणमा प्रयोग गरिएछ ।’ विडारीले आगामी दिनमा हस्ताक्षरको दुरुपयोग नहुनेतर्फ पार्टीमा छलफल गरिएको बताए ।

उनले एमालेमा पनि संसदिय दलको बैठकको उपस्थिति हस्ताक्षरण लोकमान प्रकरणमा प्रयोग भएको दावि गरे । लोकमान व्यवस्था नै फेल गराउन अग्रसर भएकाले महाअभियोगको प्रक्रिया अघि बढाउनु परेको उनको भनाई छ । एन्फा प्रकरणतर्फ लक्षित गर्दै उनले भने राजतन्त्रवादीका मुद्धालाई वेवास्ता र गणतन्त्रवादीका मुद्धालाई बढि ध्यान दिने काम लोकमानबाट भईरहेको विडारीको भनाई छ । सर्वोच्च अदालतको म्याद तामेलिमा अवरोध र संसदिय समितिको अवमूल्यन गर्नु संवैधानिक निकायको प्रमुखको हैसियतमा लोकमानले गरेको गम्भिर गल्ति भएको कानूनका जानकार विडारीले बताए ।
संविधान संशोधनमा एमाले, महाअभियोगमा काँग्रेस सहमत
सांसद रामनारायण विडारीले छिटै नै संविधान संशोधन हुने दावि गरे । उनले एक साता अघि नै संविधान संशोधनबारे सहमति जुटेको दावि गरेका हुन् । उनले महाअभियोग प्रकरणले संविधान संशोधनको विषयमा सहमति जुटाउन सहयोग गरेको बताए । उनका अनुसार संविधान संशोधनमा एमाले र महाअभियोग पारित गर्नेमा काँग्रेस सहमत भईसकेका छन् । दुबै काम प्रक्रिया अनुसार अघि बढ्ने उनले बताए ।

संविधान संशोधनमा उठेका सिमांकन, अंगिकृत नागरिकता, राष्ट्रिय सभामा प्रतिनिधित्व लगायतका विषयमा सहमति जुटेको उनको भनाई छ ।