हेटौँडा–१७ को दिव्यज्योति विद्यालयलाई सहयोग

१७ फागुन, हेटौँडा । हेटौँडा–१७ चुच्चेखोलामा रहेको दिव्यज्योति आधारभुत विद्यालयलाई दुई संस्थाबाट सहयोग प्रदान गरिएको छ ।
एनसिसी बैंक हेटौँडा शाखा र आईए विए ट्रेडर्सले दिव्यज्योति विद्यालयलाई सहयोग प्रदान गरेका हुन् । एनसिसी बैंकले नगद १५ हजार रुपैँया र २ थान कम्प्युटर सहयोग गरेको छ भने आईए विए ट्रेडर्सका संचालक ईश्वरचन्द्र अग्रवालका छोरा अजय अग्रवालबाट ८० थान पोशाक सेट सहयोग प्राप्त भएको छ । विद्यालयमा शुक्रबार भएको अन्तरक्रिया कार्यक्रममा सहयोग हस्तान्तरण गरिएको थियो । कार्यक्रममा विद्यालयका पूर्व प्रधानाध्यापक एवं शिक्षक पुरुषोत्तम शर्मालाई सम्मान गरिएको थियो । हेटौँडा वडा नम्बर १७ का अध्यक्ष भैरबबहादुर राईको प्रमुख आतिथ्यता एवं विद्यालयका अध्यक्ष रोशन घिमिरेको अध्यक्षतामा कार्यक्रम भएको थियो । 
कार्यक्रममा वडा सदस्य भीमप्रसाद घिमिरे, विद्यालयका पूर्व अध्यक्ष जयराम घिमिरे, एनसिसी बैंकका हेटौँडा शाखा प्रमुख विद्यासागर दुलाल, चुच्चेखोला सामुदायिक वन उपभोक्ता समूहका अध्यक्ष अर्जुनप्रसाद दाहाल, विद्यालयका प्रधानाध्यापक उद्धवप्रसाद दुलाल लगायतले मन्तव्य व्यक्त गरेका थिए । कक्षा ८ सम्म अध्ययन हुने विद्यालयमा १ सय ५० विद्यार्थी रहेका छन् । कार्यक्रममा विद्यालय संचालक समिति, पूर्व पदाधिकारी, अभिभावक लगायतको सहभागिता रहेको थियो ।