हेटौँडामा मंगलबारदेखि जुत्ता चप्पल मेला हुने

२७ फागुन, हेटौँडा । हेटौँडामा मंगलबारदेखि मकवानपुर जुत्ता चप्पल व्यापार मेला हुने भएको छ । फुटवेयर म्यानुफ्याक्चर्स एशोसियसन अफ नेपालको आयोजनामा २० दिनसम्म मेला हुन लागेको हो ।
हेटौँडाको पल्पसा सभागृहमा हुने मेलाको मंगलबार उद्योग, पर्यटन, वन तथा वातावरण मन्त्री अरुण नेपालले उद्घाटन गर्ने आयोजकले सोमबार मकवानपुर उद्योग बाणिज्य संघमा पत्रकार सम्मेलन गरी जानकारी दिएको छ । पत्रकार सम्मेलनमा मेला संयोजक एवं एशोसियसनका पूर्व अध्यक्ष होमनाथ उपाध्यायले मेलामा ५० भन्दा बढि स्टलमा विएफ डियर हिल सुज, रोयल सुज, रन सुज, क्रसरोड सुज, हाईलाईफ चप्पल, सुल्याण्ड, कोशेली लगायतका ब्राण्डका एक हजार भन्दा बढि मोडलका चुत्ता चप्पल पाईने बताए । मेलामा विद्यालय पोशाक र शैक्षिक सामग्रीको स्टल समेत रहने जनाईएको छ । 
मेलामा जुत्ता, चप्पल लगायतका सामग्री खरिदमा १५ देखि ६० प्रतिशतसम्म छुटको व्यवस्था गरिएको उपाध्यायले जानकारी दिए । मेलामा २ लाख ५० हजार दर्शकले अवलोकन गर्ने र २ करोड ५० लाख रुपैँयाको कारोबार हुने आयोजकले दावि गरेको छ । मकवानपुर उद्योग बाणिज्य संघका अध्यक्ष कृष्ण कटुवालको अध्यक्षतामा भएको पत्रकार सम्मेलनमा नेपाल उद्योग बाणिज्य महासंघका केन्द्रीय सदस्यहरु राजकुमार न्यौपाने, अरुणराज सुमार्गी, मकवानपुर उद्योग बाणिज्य संघका बरिष्ठ उपाध्यक्ष माधव न्यौपाने, फुटवेयर म्यानुफ्याक्चर्स एशोसियसन अफ नेपालका सदस्य रुद्र न्यौपाने लगायतले मन्तव्य व्यक्त गरेका थिए ।